Phili 4 | KaaIBT22L | STEP | Sonlıqtan shın júrekten saǵınıp júrgen súyikli tuwısqanlarım, quwanıshım hám basımnıń tajı, Iyemiz benen qatnasıńız bekkem bolsın, qádirdanlarım!

‏ Philippians 4

Aqıl-násiyatlar

1 Sonlıqtan shın júrekten saǵınıp júrgen súyikli tuwısqanlarım, quwanıshım hám basımnıń tajı, Iyemiz benen qatnasıńız bekkem bolsın, qádirdanlarım!

2 Evodiyaǵa ótinish etemen, Sintixiyaǵa da ótinish etemen, Iyemiz benen qatnasta bolǵan sizler, awızbirshilikli bolıńlar! 3 Awa, sadıq Sizigus ^{▼▼ Sizigus – «haqıyqıy joldas» degendi bildiredi.} saǵan da jalbarınaman, bul hayallarǵa járdem ber. Sebebi olar meniń menen, Kliment penen hám basqa xızmetshiler menen birge Xosh Xabardı járiyalaw ushın awır miynet etti. Olardıń hámmesiniń atları Ómir kitabında ^{▼▼ Ómir kitabı – máńgilik ómirge iye bolǵanlardıń atları jazılǵan Qudaydıń kitabı.} jazılǵan.

4 Iyemiz benen qatnasta bolıp, bárqulla quwanıńlar. Tákirarlap aytaman: quwanıńlar. 5 Sizlerdiń adamgershiligińiz hámme adamlarǵa málim bolsın. Iyemizdiń keletuǵın waqtı jaqın. 6 Hesh nárseden táshiwish shekpeńler. Al hámme nárse ushın Qudayǵa duwa etip hám jalbarınıp, hár bir tilegińizdi Oǵan shúkirlik penen bildirińler. 7 Sonda hár qanday aqıl-oydan zıyat bolǵan Qudaydıń tınıshlıǵı Masiyx Iysa arqalı kewillerińizdi hám oy-pikirlerińizdi qorǵaydı.

8 Tuwısqanlarım, juwmaqlap aytqanda, tek ǵana nelerdiń haqıyqıy, nelerdiń húrmetli, nelerdiń haq, nelerdiń pák, nelerdiń unamlı, nelerdiń maqtawǵa turarlı, jáne de, neniń jaqsı hám neniń alǵısqa ılayıqlı ekeni haqqında tereń oylańlar. 9 Mennen nelerdi úyrenip, qabıl etip, esitip hám kórgen bolsańız, solardı isleńler. Sonda tınıshlıq beriwshi Qudaydıń Ózi sizler menen birge boladı.

Paveldiń minnetdarshılıǵı

10 Maǵan endi jáne ǵamxorlıq kórsetip atırǵanıńız sebepli, Iyemizde qattı quwanaman. Álbette, sizler burın da maǵan ǵamxorlıq qılıwdı oylaytuǵın edińiz, biraq buǵan múmkinshilik joq edi. 11 Men bul sózlerdi meniń bir mútájligim bolǵanlıqtan aytıp atırǵan joqpan. Óytkeni men hár qanday jaǵdayda da barıma qanaat etiwge úyrengenmen. 12 Joqshılıqta da, molshılıqta da jasawdıń ne ekenin bilemen. Hár qanday awhalda da: toqshılıqta hám ashlıqta, molshılıqta hám mútájlikte jasawdıń sırın úyrendim. 13 Maǵan kúsh-quwat beretuǵın Iysa Masiyx penen birge hámme nárseni isley alaman.

14 Degen menen, sizler meniń qıyınshılıqlarımdı bólisip, jaqsı isledińler. 15 Siz filipliler, sizlerge birinshi ret Xosh Xabardı járiyalap, Makedoniyadan shıqqan waqtımda basqa jámáátler emes, al tek sizler ǵana meniń menen alıs-beris qılǵanıńızdı ózlerińiz de bilesizler. 16 Men Salonikada bolǵan waqtımda da sizler bir neshe mártebe maǵan mútáj nárselerimdi jetkizdińler. 17 Men bunı sizlerden bir zat almaqshı bolıp emes, al sizlerdiń esabıńızda ruwxıy jemis kóbeysin dep aytıp atırman. 18 Mende hámme nárse bar, hátte, artıp ta atır. Epafrodit arqalı jibergen nárselerińizdi alǵanlıǵım sebepli, hesh mútájligim qalmadı. Bul nárseler – xosh iyisli tútetki hám Quday unatıp qabıl etetuǵın qurbanlıq. 19 Meniń Qudayım sizlerdiń hár bir mútájligińizdi Masiyx Iysa arqalı Óziniń saltanatlı baylıǵı menen qanaatlandıradı. 20 Ákemiz Qudayǵa máńgi-baqıy dańq bolsın! Awmiyin.

Sońǵı sálemnama hám tilek

21 Masiyx Iysaǵa tiyisli bolǵan barlıq muxaddeslerge sálem aytıńlar. Janımdaǵı tuwısqanlar sizlerge sálem aytıp atır. 22 Barlıq muxaddesler, ásirese Rim imperatorınıń sarayındaǵılar sizlerge sálem aytıp atır.

23 Iyemiz Iysa Masiyxtıń miyrimi ruwxıńızǵa yar bolsın!