‏ Proverbs 11

1Jaratqan Iye jalǵan táreziden jerkener,
Durıs tárezige Onıń kewli tolar.
2Menmenlik kelse, masqarashılıq ta keler,
Kishipeyilliler danalıq penen birge bolar.
3Haq niyetliniń minsizligi oǵan jol kórseter,
Opasızdıń sumlıǵı óziniń basına jeter.
4Ǵázep kúni baylıq payda bermes,
Ádillik ólimnen qutqarar.
5Minsizdiń ádilligi onıń jolın dúziw qılar,
Zalım zalımlıǵı sebepli qulap túser.
6Haq niyetlini ádilligi qutqarar,
Opasızlar óz nápsiniń torına túser.
7Zalım adam ólgende, úmiti de úziler,
Súyengen baylıǵı da paydasız bolar.
8Ádil adam báleden qutılar,
Onıń ornına zalım sol bálege duwshar bolar.
9Qudaysız jaqının tili menen joq qılar,
Ádiller óz bilimi menen aman qalar.
10Ádiller jaynap-jasnasa, qala yoshlanar,
Zalımlar qulasa, quwanısh penen baqırısar.
11Haq adamlardıń aq pátiyası menen qala rawajlanar,
Zalımlardıń awzı menen ol wayran bolar.
12Aqılsız jaqının kemsiter,
Aqıllı awzına bek bolıp júrer.
13Ósek tasıǵan sırdı ashar,
Sadıq adam sırdı saqlar.
14Qáwendersiz el qular,
Keńesshisi kóp el jeńer.
15Basqaǵa kepil bolǵan bálege jolıǵar,
Kepil bolıwdan qashqan qáwipsizlikte bolar.
16Miyrimli hayal abırayǵa eriser,
Tas bawır erkek tek baylıqqa iye bolar.
17Miyrimli adam óz janına jaqsılıq qılar,
Tas bawır ózine zıyan keltirer.
18Zalım aldamshı sıy ushın miynet eter,
Ádillik sebiwshi haqıyqıy sıy alar.
19Ádillikti bekkem uslaǵan jasar,
Jawızlıqqa umtılǵan óler.
20Hiyleker júrekli Jaratqan Iyege jerkenishli,
Al minsiz júrgenge Onıń kewli tolar.
21Bilip qoy, jawız adam jazasız qalmas,
Ádildiń áwladı aman qalar.
22Sulıw, biraq ádepsiz hayal,
Shoshqanıń murnına taǵılǵan altın árebekke megzer.
23Ádillerdiń tilegi tek jaqsılıq,
Al zalımlardıń kútkeni – ǵázep.
24Birew keń peyillik penen shashar, sonda da baylıǵı arta berer,
Birew hádden tıs saq, biraq jarlılana berer.
25Saqıy bolǵan molshılıqqa eriser,
Shóllegenge suw bergenniń ózine de suw beriler.
26Biydaydı jasırǵandı xalıq náletler,
Onı satqanǵa pátiya beriler.
27Jaqsılıqqa talpınǵan bereket tabar,
Jawızlıqtı izlegenge jawızlıq keler.
28Óz baylıǵına isengen qular,
Ádiller bolsa jasıl japıraqtay jaynap óser.
29Xojalıǵın azapqa qaldırǵan samaldı miyras etip alar,
Aqılsız danaǵa qul bolar.
30Ádildiń miywesi – ómir teregi,
Dana adam adamlardı ózine tartar.
31Eger ádil adamǵa jer betinde isine say qaytarılsa,
Onda zalımlar menen gúnakarlarǵa sirá da jaza beriler.