‏ Proverbs 15

1Múláyim juwap ashıwdı basar,
Ashshı sóz ǵázepti qozǵar.
2Dananıń tili bilimdi maqtar,
Aqılsızdıń awzınan aqmaqlıq aǵar.
3Jaratqan Iyeniń kózi hámme jerde,
Ol jamandı da, jaqsını da kórip turar.
4Múláyim til – ómir teregi,
Ótirikshi til – jandı jaralar.
5Aqmaq ákesiniń tárbiyasınan bezer,
Eskertiwge qulaq asqan aqıl-parasatlı.
6Ádildiń úyinde mol ǵáziyne bolar,
Zalımnıń tapqanı mashqala alıp keler.
7Dananıń awzı bilim taratar,
Aqmaqtıń júregi onday emes.
8Nahaqtıń qurbanlıǵınan Jaratqan Iye jerkener,
Haq adamnıń duwası Oǵan unar.
9Zalımnıń jolınan Jaratqan Iye jerkener,
Ádillik izinen júrgendi Ol súyer.
10Tuwrı joldan adasqanlar awır jaza alar,
Eskertiwdi jek kórgenler nabıt bolar.
11Óliler mákanı hám nabıt bolıw mákanı Jaratqan Iyege ayan eken,
Demek, adam balasınıń júregi Oǵan olardan da ayanıraq!
12Surbet ózin áshkaralaǵandı unatpas,
Ol dananıń qasına da jolamas.
13Júrektiń quwanıshı júzdi jarqıratar,
Júrektiń qayǵısı ruwxtı sóndirer.
14Aqıllınıń júregi bilimdi izler,
Aqılsızdıń awzı aqmaqlıqqa toyınar.
15Baxıtsızdıń hár bir kúni qayǵıdan arılmas,
Júregi quwanıshlınıń zıyapatı ada bolmas.
16Kóp baylıq penen táshiwishte jasaǵannan góre,
Az baylıq penen Jaratqan Iyeden qorqıp jasaǵan abzalıraq.
17Jek kórip berilgen semiz baspaq góshinen góre,
Súyispenshilik penen berilgen bılamıq jaqsıraq.
18Ashıwshaq jánjel tuwdırar,
Sabır-taqatlı dawdı basar.
19Erinshektiń jolı shatlı tikenge uqsar,
Haq adamnıń jolı tegis bolar.
20Dana bala ákesin quwantar,
Aqmaq bala anasın pisent etpes.
21Aqmaqlıq aqılsızdı quwandırar,
Aqıllı adam tuwrı joldan júrer.
22Keńespey islengen is bosqa shıǵar,
Kóp másláhátshiniń oy-niyeti iske asar.
23Orınlı juwap adamdı quwantar,
Óz waqtında aytılǵan sóz ájayıp bolar!
24Tómendegi óliler mákanına túspewi ushın,
Aqıllını ómir jolı joqarıǵa jeteler.
25Jaratqan Iye tákabbirdiń úyin qulatar,
Jesirdiń jer shegarasın saqlap qalar.
26Zalımlardıń niyetleri Jaratqan Iyege jerkenishli,
Jaqsı sózler – pák.
27Haram tabısqa qumar óz úyine apat keltirer,
Paranı jek kórgen tınısh ómir súrer.
28Ádil oylap juwap berer,
Zalımnıń awzı jawızlıq qusar.
29Jaratqan Iye zalımlardan alıs bolar,
Ádillerdiń duwasın esiter.
30Nurlı júz júrekti quwantar,
Jaqsı xabar súyekke azıq berer.
31Ómir beretuǵın násiyatqa qulaq salǵan,
Danalar arasınan orın tabar.
32Násiyattan júz burǵan óz janın xor qılar,
Eskertiwge qulaq salǵan aqılǵa iye bolar.
33Jaratqan Iyeden qorqıw danalıqqa úyreter,
Kishipeyillik dańqqa baslar.