‏ Proverbs 16

1Adam joba dúzer,
Biraq bul jobanıń juwabın Jaratqan Iye berer.
2Adamǵa hámme jolları hadal bolıp kóriner,
Biraq oy-niyetti Jaratqan Iye ólsher.
3Islerińdi Jaratqan Iyege tapsır,
Sonda niyetiń júzege asar.
4Jaratqan Iye hámme nárseni olardıń ózleriniń maqsetine say jarattı,
Hátte, zalımlardı da apatshılıq kúni ushın jarattı.
5Hár bir tákabbir Jaratqan Iye ushın jerkenishli,
Gúmansız, olar jazasız qalmaydı.
6Súyispenshilik hám sadıqlıq gúnanı juwar,
Jaratqan Iyeden qorqıw jawızlıqtan awlaq qılar.
7Adamnıń jolı Jaratqan Iyege maqul bolsa,
Ol onı dushpanları menen de jarastırar.
8Haram jol menen kirgen mol paydadan góre,
Hadal jol menen kirgen azǵantay payda jaqsıraq.
9Júrer jolın adam júreginde oylap qoyar,
Biraq Jaratqan Iye onıń adımların baǵdarlar.
10Patsha Qudaydıń atınan sóyleydi,
Ol húkim qılǵanda ádillikti burmalamawı tiyis.
11Tuwrı tárezi hám táreziniń pálleleri Jaratqan Iyeden beriler,
Barlıq tárezi tasları Ol arqalı jaratılǵan.
12Patsha jawızlıqtan jerkener,
Taxt ádillik arqalı bekkem bolar.
13Ádil til patshaǵa unar,
Haqıyqattı aytqandı ol súyer.
14Patshanıń ǵázebi – ólim xabarshısı,
Biraq dana adam onı tınıshlandırar.
15Patshanıń júzi nurlansa – ómirden nıshan,
Onıń miyrimi báhárdegi jawın alıp keletuǵın bultqa megzer.
16Danalıqqa iye bolıw altınnan qanshelli jaqsıraq,
Aqılǵa iye bolıw gúmisten qanshelli qunlıraq.
17Haq adamnıń jolı jawızlıqtan awlaq qılar,
Jolın qorǵaǵan óz janın aman saqlar.
18Wayran bolıwdan aldın menmenlik,
Qulawdan aldın tákabbirlik keler.
19Menmenler menen olja bóliskennen,
Jarlılar arasında kishipeyil bolǵan jaqsıraq.
20Aqıl menen is alıp barǵan jaqsılıq tabar,
Jaratqan Iyeden úmit etken baxıtlı bolar!
21Júregi danalar parasatlı deliner,
Jaǵımlı til tálim kúshin arttırar.
22Aqıl iyesi ushın – ómir bulaǵı,
Aqmaqlıq aqmaq ushın – jaza.
23Dananıń júregi onıń sózin dana qılıp,
Awzındaǵı tálimin arttırar.
24Jaǵımlı sóz palday tatlı,
Janǵa jaǵımlı, denege shıpalı.
25Sonday jol bar, adamǵa durıs bolıp kóriner,
Biraq aqıbeti, ólimge alıp barar.
26Adamnıń ishteyi oǵan miynet ettirer,
Ashlıǵı onı májbúr eter.
27Ońbaǵan adam jamanlıq oylar,
Onıń sózi jalmaytuǵın jalınǵa megzer.
28Hiyleker adam jánjel tuwdırar,
Ósekshi doslardı ayırar.
29Zorlıq islewshi jaqının azǵırar,
Onı jaman jolǵa baslar.
30Kózin súzip qaraǵan hiyle oylar,
Ernin tislegen jawızlıq isler.
31Aǵarǵan shash – húrmetli taj,
Tuwrı jasaǵan onı qolǵa kirgizer.
32Sabırlı adam márt áskerden,
Ózin uslay alatuǵın adam qalanı basıp alǵannan ústinirek.
33Kiyimniń shalǵayına shek taslanar,
Onıń sheshimi Jaratqan Iyeden beriler.