‏ Proverbs 17

1Dasturxanı mol hám zıyapatı kóp jánjelli úyden,
Bir tislem qattı nanı bar tınısh-tatıw úy jaqsıraq.
2Uyat is qılatuǵın uldı aqıllı qul basqarar,
Ol tuwısqanlar qatarında miyrasqa sherik bolar.
3Gúmis balqıtıwxanada, altın oshaqta sınalar,
Adamnıń júregin Jaratqan Iye sınar.
4Zalım jawızdıń sózine dıqqat qoyar,
Ótirikshi búlginshi tilge qulaq salar.
5Kámbaǵaldı mazaq qılǵan adam,
Onı Jaratqandı aqıretlegen bolar,
Baxıtsızlıqqa quwanǵan jazasız qalmas.
6Aqlıqlar – atalar tajı,
Ata-analar – balalar maqtanıshı.
7Tóreli sóz aqmaqqa jaraspaǵanı sıyaqlı,
Ótirik sóz de húkimdarǵa jaraspas.
8Beriwshiniń názerinde para sıyqırlı tasqa uqsar,
Ne qılsa da isi tabıslı bolar.
9Qáteni keshirgen doslıqtı saqlar,
Onı qayta-qayta esley bergen dostın bezdirer.
10Aqılsızǵa berilgen júz dúrreden góre,
Aqıllıǵa berilgen bir keyis tásirlirek.
11Jaman adam tek búlginshilikti gózler,
Sonlıqtan oǵan qarsı zalım perishte jiberiler.
12Aqmaqtıń aqmaqlıǵına tap bolǵansha,
Balasınan ayırılǵan ana ayıwǵa tap bolǵan jaqsıraq.
13Jaqsılıqqa jamanlıq qılǵannıń,
Úyinen jamanlıq arımas.
14Jánjeldiń baslanıwı jıqqın suwǵa uqsar,
Jánjeldi kúsheymesten burın toqtat.
15Nahaqtı aqlaw hám haqtı ayıplaw –
Ekewi de Jaratqan Iyege jerkenishli.
16Aqılsızdıń qolındaǵı ǵáziyneden ne payda?
Danalıqtı iyelewge onıń qálewi joq ǵoy!
17Dos hárdayım súyedi,
Tuwısqan da qayǵını bólisiw ushın tuwılǵan.
18Aqılı kem qol berip,
Qońsısı ushın kepil bolar.
19Gúnanı jaqsı kórgen jánjeldi súyer,
Dárwazasın biyik qurǵan qulawdı izler.
20Hiyleker júrek jaqsılıq tappas,
Ótirikshi til bálege jolıǵar.
21Aqılsız bala tuwǵan adamnıń mańlayınıń sorı,
Aqmaqtıń ákesi quwanıshtıń ne ekenin bilmes.
22Quwanıshlı júrek shıpa baǵıshlawshı dári,
Ezilgen ruwx súyekti quwratar.
23Ádalat jolın burmalaw ushın,
Zalım jasırın para alar.
24Aqıllı adam názerin danalıqtan qashırmas,
Aqmaqtıń kózi jer túbin sharlar.
25Aqmaq bala ákesi ushın qayǵı,
Anası ushın ǵam keltirer.
26Ayıpsızdı jazalaw,
Hasılzadanı hadallıǵı ushın urıw jaqsı emes.
27Bilimli adam tilin jılawlar,
Parasatlı adam saldamlı bolar.
28Aqmaq ta úndemese dana sanalar,
Tilin tıyıp turǵan, parasatlı bolıp kóriner.