‏ Proverbs 18

1Sayaq adam qara basın oylar,
Barlıq saw pikirge qarsı shıǵar.
2Aqmaq túsiniwdi jek kórer,
Ol óz oyın bildiriwdi xosh kórer.
3Zalım ózi menen kemsitiwshilik,
Biyabıraylıq ózi menen masqarashılıq alıp keler.
4Adamnıń awzınan shıqqan sózler tereń suwlarǵa,
Danalıq bulaǵı aǵın suwǵa megzer.
5Húkimde zalımdı jaqlap,
Ayıpsızdı nahaqqa shıǵarıw jaqsı emes.
6Aqmaqtıń tili jánjel tuwdırar,
Awzı menen dúrreni shaqırar.
7Aqılsızdıń awzı ózine ájel,
Onıń tili bolsa, janına duzaq bolar.
8Ósekshiniń sózleri sonday tatlı,
Olar adamnıń jan dúnyasına kirip alar.
9Óz jumısına nemquraydı bolıw –
Buzǵınshınıń tuwısqanı.
10Jaratqan Iyeniń atı – bekkem qorǵan,
Ádil oǵan qashıp, bas sawǵalar.
11Baydıń baylıǵı onıń bekkem qalası,
Óz qıyalına biyik diywalday kóriner.
12Qular aldınan adamnıń júregi tákabbirlener,
Húrmetten aldın kishipeyillik keler.
13Tıńlamay juwap beriw,
Aqmaqlıq hám uyatsızlıq.
14Adamnıń dártine ruwxı tózim berer,
Biraq ezilgen ruwxqa kim shıdam berer?
15Aqıllınıń júregi bilimdi iyeler,
Dananıń qulaǵı bilimdi izler.
16Sıy beriw adamǵa jol ashar,
Húrmetli adamlar aldına deyin aparar.
17Qarsılası kelip, oǵan soraw qoyıp teksermegenshe,
Birinshi bolıp dawlasqan haq bolıp kóriner.
18Shek taslaw dawdı toqtatar,
Kúshli qarsılaslardıń dawın shesher.
19Ókpeli tuwısqan bekitilgen qalaǵa,
Arasındaǵı daw bolsa, qorǵan qala dárwazasınıń támbisine uqsar.
20Adam awzınıń jemisinen qarnın,
Tiliniń óniminen ózin toydırar.
21Ólim hám ómir tildiń ıqtıyarında,
Til ne sóylese, sonıń jemisinen dám tatar.
22Úylengen bereket tabar,
Jaratqan Iyeniń miyrimine eriser.
23Jarlı jalınıp sóyler,
Bay turpayı juwap berer.
24Doslar bar, ózin dos qılıp kórsetken,
Biraq shın dos ta bar, tuwısqannan da jaqın.