‏ Proverbs 19

1Jalǵan tilli aqmaqtan,
Minsiz júrgen jarlı jaqsı.
2Bilimsiz umtılıs jaqsı emes,
Asıqqan joldan jańılısar.
3Óz aqmaqlıǵı adamnıń jolın buzar,
Al onıń júregi Jaratqan Iyege narazı bolar.
4Baylıq doslardı kóbeyter,
Jarlını dostı da taslap keter.
5Jalǵan gúwa jazasız qalmas,
Ótirik sóylegen qutıla almas.
6Kópler jomart adamnıń miyrimine túsiwdi qáler,
Qolı ashıqqa hámme dos bolar.
7Jarlını tuwısqanları da jek kórer,
Dosları da onnan sonshelli bezip keter,
Sóylesiw ushın izlese de, olardı taba almas.
8Danalıqqa erisken óz janın súyer,
Aqıl-parasatqa kewil qoyǵan jaqsılıq tabar.
9Jalǵan gúwa jazasız qalmas,
Ótirikshi tiri qalmas.
10Saltanatlı ómir aqmaqqa jaraspaǵanı sıyaqlı,
Baslıqlarǵa biylik etiw qulǵa sirá dá jaraspas.
11Aqıl adamnıń ǵázebin tıyar,
Qáteni keshiriw oǵan húrmet keltirer.
12Patshanıń ǵázebi arıslannıń aqırıwına uqsar,
Al onıń miyrimi shópke túsken shıqqa uqsar.
13Aqılsız bala ákesiniń basına bále bolar,
Urısqaq hayal toqtamay tamatuǵın suwǵa uqsar.
14Úy hám baylıq – ata-anadan miyras,
Aqıllı hayal – Jaratqan Iyeden sıy.
15Qosjaqpaslıq adamdı qattı uyqıshı qılar,
Erinshek ash qalar.
16Buyrıqlardı orınlaǵan ómirin saqlar,
Óz jolına itibar bermegen nabıt bolar.
17Jarlıǵa miyrim kórsetiw – Jaratqan Iyege qarız bergendey bolar,
Islegen jaqsılıǵınıń esesin Jaratqan Iye qaytarar.
18Úmit barda balańdı jónge sal,
Onıń óliwine ayıplı bolma.
19Ashıwshaq jazasın alsın,
Eger qutqarsań, onı jáne de jazalawǵa tuwrı keledi.
20Keleshekte dana bolıwıń ushın,
Keńesti tıńlap, násiyattı qabıl et.
21Adam júreginde niyet kóp,
Biraq tek Jaratqan Iyeniń maqseti ámelge asar.
22Adamnıń qálewi – sadıqlıq,
Jarlı bolıw ótirikshi bolıwdan jaqsıraq.
23Jaratqan Iyeden qorqıw ómirge jeteler,
Ol tınısh hám mashqalasız jasar.
24Erinshek tabaqqa qol salar,
Biraq awzına aparıwǵa eriner.
25Surbetti jazalasań, sadalar aqılǵa kirer,
Eger aqıllını áshkaralasań, ol sonnan sabaq alar.
26Ákesin tonap, anasın quwǵan bala,
Júzi qara hám uyatsız bala.
27Balam, násiyattı tıńlawdı toqtatqanıń,
Bul bilimli sózlerden bas tartqanıń.
28Jaramas gúwa ádalatlıq ústinen kúler,
Zalımlardıń awzı jamanlıqtı jalmap jutar.
29Surbetler ushın húkim tayar,
Aqmaqtıń arqasına dúrre tayar.