‏ Proverbs 20

1Sharap – surbet, ótkir ishimlik – jánjelkesh,
Olardı iship aldanǵan hár bir adam aqılsız.
2Patshanıń qáhári arıslannıń aqırǵanına uqsar,
Onıń qáhárin keltirgen ómiri menen juwap berer.
3Jánjelden awlaq bolıw adamǵa abıray keltirer,
Barlıq aqmaqlar jánjelge asıǵar.
4Erinshek waqtında jer súrmes,
Jıyın waqtında hesh nárse tappas.
5Adamnıń oy-pikiri tereń suwǵa megzer,
Aqıllı adam olardı tereńnen ilip shıǵarar.
6Kópler ózin sadıqpan der,
Biraq haqıyqattan isenimli adamdı kim taba alar?
7Ádil minsiz jasar,
Izindegi balaları baxıtlı bolar!
8Patsha húkim gúrsisinde otırǵanda,
Kózleri menen barlıq jawızlıqtı ajıratar.
9Kim: «Meniń júregim taza,
Hadal hám gúnasızban», – dep ayta alar.
10Nadurıs tárezi hám nadurıs taslar,
Ekewi de Jaratqan Iyege jerkenishli.
11Hátte, bala da isinen biliner,
Onıń tazalıǵı da, durıslıǵı da háreketinen ayan bolar.
12Esitetuǵın qulaqtı, kóretuǵın kózdi,
Ekewin de Jaratqan Iye jaratqan.
13Uyqıshıl bolma, joqshılıqqa ushırarsań,
Qıraǵı bol, nanıń mol bolar.
14Satıp alıwshı: «Jaramsız nárse», – der,
Bılay shıǵıp, arzan alǵanına maqtanar.
15Altın bar, qımbatbaha tas ta mol,
Bilimli til – taptırmaytuǵın hasıl tasqa megzer.
16Biytanısqa kepil bolǵannıń kiyimin sheship al,
Onı basqaǵa kepil bolǵanı ushın girewge uslap tur.
17Hiyle menen tabılǵan nan mazalı,
Biraq keyin awız tolǵan qumǵa aylanar.
18Másláhát penen jobalar dúz,
Dana keńes penen urısqa shıq.
19Ósek tasıǵan sırıńdı ashar,
Awzı bos penen qatnas qılma.
20Ata-anasın ǵarǵaǵannıń,
Qoyıw qarańǵılıqta ómir shıraǵı sóner.
21Áwel bastan, asıǵıs qolǵa kirgizilgen miyrastıń,
Aqırı bereketli bolmas.
22«Jamanlıq ushın ósh alaman», – deme,
Jaratqan Iyege tapsırıp kút, Ol seni qutqarar.
23Nadurıs ólshem tasları Jaratqan Iyege jerkenishli,
Nadurıs tárezi de jaqsı emes.
24Adamnıń adımların Jaratqan Iye belgiler,
Solay eken, adam óz jolın qalay túsinsin?
25Asıǵıs wáde etip, Qudayǵa ataw,
Atap bolıp, oylanıw,
Bul – adam ushın duzaq.
26Aqıllı patsha jawızlardı ajıratıp,
Olardıń ústinen túyek aydaydı.
27Adamnıń ruwxı – Jaratqan Iyeniń shıraǵı,
Ol adam qálbiniń tereńliklerin izertler.
28Miyrim-shápáát hám sadıqlıq patshanı qorǵar,
Miyrim menen ol taxtın bekkem qılar.
29Jaslardıń maqtanıshı – olardıń kúsh-quwatı,
Jası úlkenlerdiń abırayı – olardıń aq shashları.
30Tayaqtan qalǵan jaraqat jawızlıqtan tazartar,
Tayaqtıń zardabı ishki dúnyanı pákler.