‏ Proverbs 21

1Patshanıń júregi Jaratqan Iyeniń qolındaǵı suw aǵısına uqsar,
Ol patshanı qálegen jaǵına baǵıtlar.
2Óz jolınıń hámmesi adamǵa tuwrı bolıp kóriner,
Biraq Jaratqan Iye júrekti tekserer.
3Ádillik hám ádalatlıqtı saqlaw,
Jaratqan Iye ushın qurbanlıq bergennen unamlıraq.
4Tákabbir názer hám menmen júrek,
Zalımlardıń shıraǵı hám gúnası.
5Miynetkesh adamnıń oy-niyeti molshılıq alıp keler,
Asıǵıslardıń bári joqshılıqqa ushırar.
6Jalǵan til menen jıynalǵan baylıq,
Joq bolıp ketetuǵın puw hám ólim duzaǵı.
7Zalımlardıń zulımlıǵı ózin joq qılar,
Olar ádalatlı is tutıwdan bas tartar.
8Ayıplınıń jolı qıysıq,
Ayıpsızdıń is-háreketi tuwrı.
9Urısqaq hayal menen bir úyde jasaǵannan,
Úshektiń bir múyeshinde jasaǵan jaqsı.
10Zalımnıń kewli jawızlıqqa qumar,
Jaqını da onnan rehim tappas.
11Surbetke jaza berilse, sadaǵa aqıl kirer,
Dana tálim alsa, bilimi artar.
12Ádil Quday zalımnıń úyin baqlar,
Zalımlardı nabıt qılar.
13Jarlınıń páriyadına qulaq salmaǵan,
Ózi páriyad qılǵanda juwap ala almas.
14Jasırın berilgen sawǵa ǵázepti,
Qoyınǵa tıǵıp berilgen para kúshli qáhárdi basar.
15Ádalat júzege assa, ádiller quwanar,
Al jawızlıq qılıwshılardı qorqınısh biyler.
16Aqıllılıq jolınan uzaqlasqan,
Óliler jıyınına ornalasar.
17Zawqı-sapanı súygen jarlılanar,
Sharaptı hám záytún mayın súygen bayımas.
18Zalım ádildiń,
Biyopa haqtıń tólemi bolar.
19Urısqaq hám kekshil hayal menen jasaǵannan,
Shólde jasaǵan jaqsıraq.
20Dananıń úyi qımbatbaha ǵáziyne hám záytún mayına tolar,
Aqılsız barın shashar.
21Ádillik hám miyrim izlegen adam,
Ómir, ádalat hám húrmetke iye bolar.
22Dana adam kúshlilerdiń qalasına kirer,
Olar isengen qorǵandı tas-talqan qılar.
23Awzına hám tiline bek bolǵan,
Janın apattan saqlar.
24Órkókirek hám tákabbirdi surbet dep atar,
Ol asa menmenlik penen háreket eter.
25Erinshekti qumarlıǵı óltirer,
Qolları jumıstan bas tartar.
26Ol kún boyı ashkózlik penen alıwdı gózler,
Biraq ádil ayamay berer.
27Zalımnıń qurbanlıǵı – jerkenishli,
Ásirese, jawız oy menen berse, onnan da jaman.
28Jalǵan gúwa nabıt bolar,
Hámmesin esitkenniń gúwalıǵı óter.
29Zalım júzin isenimli qılıp kórseter,
Ádil adam óz jolında bekkem turar.
30Jaratqan Iyege qarsı turatuǵın,
Danalıq ta, túsinik te, keńes te joq.
31At sawash kúni ushın tayınlanar,
Biraq jeńis Jaratqan Iyeden beriler.