‏ Proverbs 22

1Jaqsı ataq úlken baylıqtan jaqsı,
Jaqsı ataq-abıray gúmis hám altınnan jaqsı.
2Bay hám jarlınıń ortaqlıǵı mınada:
Olardıń ekewin de Jaratqan Iye jaratqan.
3Aqıllı qáwip-qáterdi kórip, bas sawǵalar,
Sada alǵa basıp bara berip, zálel kórer.
4Kishipeyillik hám Jaratqan Iyeden qorqıw ushın beriletuǵın sıy –
Baylıq, dańq hám ómir.
5Azǵınnıń jolı tiken hám duzaqqa tolı,
Janın saqlamaqshı bolǵan onnan awlaq júrsin.
6Balanı jastan tuwrı jolǵa sal,
Ol qartayǵanda da onnan taymaydı.
7Baylar jarlılarǵa ústemlik qılar,
Qarızdar qarız bergenge qul bolar.
8Nahaqlıq qılǵan apat orar,
Onıń ǵázep qamshısı sınar.
9Saqıy adam bereket tabar,
Óz nanın jarlılar menen bóliser.
10Surbetti quwsań, jánjel de keter,
Daw hám keyis te toqtar.
11Júrek pákligin súyetuǵın hám jaǵımlı sóyleytuǵın adamǵa,
Patsha dos bolar.
12Jaratqan Iyeniń názeri bilimdi qorǵar,
Opasızdıń sózlerin Ol joqqa shıǵarar.
13Erinshek: «Dalada arıslan bar!
Maydan ortasında meni óltiredi!» – der.
14Buzıq hayaldıń awzı túpsiz shuqırǵa megzer,
Jaratqan Iye kimge ǵázeplense, ol sol shuqırǵa qular.
15Aqılsızlıq óspirimniń júreginde bar,
Tárbiyalawshı qamshı onı sonnan arıltar.
16Bayıw ushın jarlıǵa jábir kórsetetuǵın,
Bayǵa sıy beretuǵın adam kámbaǵallasadı.

Danalardıń otız násiyatı

17Danalardıń sózlerin qulaq túrip tıńla,
Beretuǵın bilimime júregińdi ash.
18Olardı júregińde saqlasań,
Hám olar seniń tillerińde bolsa, jaqsı boladı.
19Isenimińdi Jaratqan Iyege artıwıń ushın,
Búgin bulardı saǵan, awa, saǵan úyretip atırman.
20Másláhát hám bilim menen,
Saǵan otız násiyat jazbaǵan ba edim?
21Bul isenimli haqıyqat sózlerin úyreniwiń,
Seni jibergenge durıs juwap bere alıwıń ushın jazılǵan emes pe edi?

Birinshi násiyat

22Jarlını jarlılıǵı sebepli tonama,
Baxıtsızdı qala dárwazası aldında húkim qılǵanda qıynama.
23Olardıń isin Jaratqan Iye jaqlar,
Olardı tonaǵanlardıń janın alar.

Ekinshi násiyat

24Ashıwshaq adam menen dos bolma,
Qızba adam menen joldas bolma.
25Bolmasa, sen de oǵan eliklerseń,
Janıńdı duzaqqa túsirerseń.

Úshinshi násiyat

26Qol berip,
Basqanıń qarızına kepil bolatuǵınlardıń biri bolma.
27Tólew ushın hesh nárseń bolmasa,
Tósegińdi de astıńnan tartıp alar.

Tórtinshi násiyat

28Ata-babalarıń qoyıp ketken,
Eski shegara belgisin jıljıtpa.

Besinshi násiyat

29Óz kásibiniń mamanı bolǵan adamdı kórdiń be?
Ol patshalarǵa xızmet eter,
Ápiwayı adamlarǵa xızmet etpes.