‏ Proverbs 24

On toǵızınshı násiyat

1Zalım adamlarǵa háwes qılma,
Olar menen birge bolıwdı kúseme.
2Olardıń oyı zorlıq etiwdi oylar,
Awzı mashqala keltiriw tuwralı sóz eter.

Jigirmalanshı násiyat

3Danalıq penen úy salınar,
Aqıl menen bekkem bolar.
4Bilim menen úydiń ishi,
Qımbatbaha hám ájayıp baylıqqa tolar.

Jigirma birinshi násiyat

5Dana adam kúshli bolar,
Bilimli adam kúshke tolıp barar.
6Sonlıqtan urıstı aqıl-keńes penen alıp bar,
Másláhátshi kóp jerde jeńis bar.

Jigirma ekinshi násiyat

7Aqmaq ushın danalıq qol jetpes bolar,
Májiliste ol awzın da ashpas.

Jigirma úshinshi násiyat

8Jamanlıq islewdi niyet etken adam,
Niyeti buzıq dep atalar.
9Aqmaqtıń haram oyı – gúna,
Surbet – adamlar ushın jerkenishli.

Jigirma tórtinshi násiyat

10Eger sen apatqa ushıraǵanda hálsizlik etseń,
Onda seniń kúshińniń az bolǵanı.

Jigirma besinshi násiyat

11Ayıpsız ólimge kesilgendi qutqar,
Soymaqshı bolǵandı izine qaytar.
12«Biz bunı bilmedik», – deseń de,
Júrekti sınaytuǵın Quday shınlıqtı bilmey me?
Janıńdı qorǵaytuǵın bunı ańlamay ma?
Ol hár bir adamǵa isine jarasa qaytarmay ma?

Jigirma altınshı násiyat

13Balam, pal je, ol jaqsı,
Pal uyanıń palı tańlayıńa tatlı.
14Sol sıyaqlı, danalıq ta janıńa tatlı,
Eger onı tapsań, keleshegiń bolar,
Úmitiń de úzilmes.

Jigirma jetinshi násiyat

15Háy zalım, ádildiń úyine jawızlıq oylama,
Onıń mákanın wayranlama.
16Ádil jeti ret jıǵılsa da, turıp keter,
Zalım apatshılıqtan nabıt bolar.

Jigirma segizinshi násiyat

17Dushpanıń jıǵılsa, quwanba,
Súrnikse, shadlanba.
18Solay isleseń, Jaratqan Iye bunı kórip, narazı bolar,
Dushpanıńa degen ǵázebinen qaytar.

Jigirma toǵızınshı násiyat

19Jawızlıq qılıwshılarǵa qáhárlenbe,
Zalımlarǵa háwes qılma.
20Jawızlıq qılıwshılardıń keleshegi joq,
Zalımlardıń shıraǵı óship qalar.

Otızınshı násiyat

21Balam, Jaratqan Iyeden hám patshadan qorq,
Qozǵalańshı menen sherik bolma.
22Jaratqan Iye hám patsha tosattan bále jiberer,
Olar ekewiniń qanday bále jiberetuǵının kim biler?

Danalardıń basqa násiyatları

23Mınalar da danalardıń aytqanları:

Húkimde adamdı alalaw jaqsı emes.
24Ayıplıǵa: «Sen ayıpsızsań», – degendi xalıqlar náletler,
Milletler onı jek kórer.
25Ayıplını jazalaǵan tabısqa eriser,
Oǵan jarılqawlar jawar.
26Tuwrı juwap,
Haqıyqıy doslıqtıń belgisi.
27Sırttaǵı islerińdi pitker,
Egislik jerińdi tártipke sal,
Sońınan úyińdi qur.
28Sebepsiz jaqınıńa qarsı jalǵan gúwalıq berme,
Awzıń menen ótirik sóyleme.
29«Maǵan ne qılǵan bolsa, ózine de sonı isleymen,
Ol ne qılsa, ózine sonı qaytaraman», – deme.

30Men erinshektiń atızınan,
Essizdiń júzimzarınan óttim.
31Qarasam, hámmesine tikenler ósken,
Jeriniń betin jabayı shóp basqan,
Tas diywalı da qulaǵan.
32Qarap, oylanıp qaldım,
Kórip, sabaq aldım.
33Biraz uyıqlap, az-maz múlgip otırsań,
Geyde qol qawsırıp, jatıp ta alsań,
34Tonawshıday bolıp, joqshılıq jetip keler,
Qaraqshıday bolıp, mútájlik bas salar.