‏ Proverbs 25

Sulaymannıń hikmetleriniń ekinshi bólimi

1Mınalar da Yahuda patshası Xizkiyanıń adamları tárepinen jazıp alınǵan Sulaymannıń hikmetleri:

2Isti qupıya etiw – Qudaydıń dańqı,
Isti izertlep ashıw – patshalardıń dańqı.
3Aspannıń biyikligi, jerdiń tereńligi kibi,
Patshanıń oy-niyeti de túsinip bolmas nárse.
4Gúmisten ǵawajaqtı alıp tasla,
Sonda ónerment onnan ıdıs soǵa alar.
5Patshadan zalımdı uzaqlastır,
Onıń taxtı ádillik penen bekkem bolar.
6Patshanıń aldında gárdiyme,
Ullılardıń ornına turıp alma.
7Hasılzada aldında kemsitilgennen góre,
Onıń saǵan: «Bılay, joqarı shıq», – degeni jaqsıraq.
Kózleriń menen kórgen nárseni,
8Húkimge tapsırıwǵa asıqpa.
Eger qarsılasıń seni jeńip shıǵıp, uyaltsa,
Keyin ne qılasań?
9Dawdı jaqınıń menen jeke talqıla,
Basqanıń sırın ashpa.
10Bolmasa adamlar esitip, seni uyaltar,
Jaman atıń izińnen qalmas.
11Ornı menen aytılǵan sóz,
Gúmis tabaqqa salınǵan altın almaǵa uqsar.
12Tıńlar qulaqqa dananıń áshkaralawı,
Altın sırǵaǵa yaki sap altın taǵınshaqqa uqsar.
13Isenimli elshi ózin jibergenler ushın,
Orım-jıyın waqtındaǵı qardıń suwıǵı yańlı,
Óz xojayınlarınıń janın jay taptırar.
14Bermegen sıyın berdim dep maqtanatuǵın adam,
Qurǵaq samal hám jawmas bultqa uqsaydı.
15Sabırlılıq penen húkimdar kóndiriler,
Jumsaq til súyekti sındırar.
16Pal tapsań, jeterlisin je,
Artıq jeseń, qusıp taslarsań.
17Qońsıńa jiyi-jiyi bara berme,
Sennen bezip, jek kórip qalmasın.
18Jaqınına qarsı jalǵan gúwalıq bergen adam,
Shoqmar, qılısh hám ushlı oqqa uqsar.
19Apat kúni opasızdan úmitleniw,
Sınǵan tis hám sal bolǵan ayaqqa megzer.
20Qayǵılıǵa kewilli qosıq aytıw,
Suwıq kúni kiyimin sheship alǵanǵa,
Yamasa jaraǵa duz sepkenge megzer.
21Eger dushpanıń ash bolsa, oǵan nan ber,
Eger shóllese, suw ber.
22Solay islep, onı uyaltarsań,
Esesin Jaratqan Iyeden alarsań.
23Arqa samalı jawın alıp keler,
Ósekshi til adam júzinde ǵázep oyatar.
24Urısqaq hayal menen bir úyde jasaǵannan,
Úshektiń bir múyeshinde jasaǵan jaqsı.
25Alıs elden kelgen jaqsı xabar,
Shóllegenge berilgen salqın suwǵa megzer.
26Zalımǵa bas iygen ádil adam,
Ílaylanǵan bulaq hám pataslanǵan qudıqqa megzer.
27Kóp pal jegen jaqsı emes,
Dańq ushın umtıla beriw de dańq ápermes.
28Ózin basqara almaytuǵın adam,
Diywalsız, wayran bolǵan qalaǵa megzer.