‏ Proverbs 26

1Jazǵa qar, orım-jıyın waqtına jawın jaraspaǵanı sıyaqlı,
Aqmaqqa dańq jaraspas.
2Pırr etip ushqan shımshıqtay,
Ushıp ketken qarlıǵashtay,
Jónsiz ǵarǵıs ta adamǵa tiymes.
3Atqa qamshı, eshekke júwen,
Aqmaqtıń arqasına tayaq kerek.
4Aqmaqqa aqmaqlıq penen juwap berme,
Bolmasa, óziń de oǵan uqsap qalasań.
5Eger aqmaqqa aqmaqlıǵına say juwap bermeseń,
Onda ol ózin aqıllı sanar.
6Aqmaq arqalı xabar jibergen,
Ayaǵına balta urǵanday yamasa zorlıqqa shıdaǵanday bolar.
7Aqmaq aytqan hikmetler,
Aqsaqtıń ayaǵınday nategis bolar.
8Aqılsızdı húrmetlew,
Saqpanǵa tastı baylap atqanday paydasız.
9Aqmaq aytqan hikmetler,
Máskúnemniń qolındaǵı tikenli shaqaǵa uqsar.
10Aqmaqtı yaki dus kelgen adamdı jallawshı,
Bet aldına qaramay jaraqat salatuǵın sadaqshıǵa uqsar.
11Óz aqmaqlıǵın tákirarlaǵan aqmaq,
Óz qusıǵına qaytıp kelgen iytke uqsar.
12Ózin dana dep sanaytuǵın adamdı kórdiń be?
Sonday adamǵa qaraǵanda, aqmaqtan kóbirek úmit bar.
13Erinshek: «Jolda arıslan bar.
Maydanlarda arıslan júr», – deydi.
14Esiktiń topsada aylana bergeni sıyaqlı,
Erinshek tóseginde awnap jata berer.
15Erinshek tabaqqa qol salar,
Biraq awzına aparıwǵa eriner.
16Erinshek ózin,
Oylanıp juwap beretuǵın jeti adamnan da aqıllıraq sanar.
17Basqanıń jánjeline aralasqan,
Joldaǵı iyttiń qulaǵınan tartqanǵa uqsar.
18Telbe adamdı óltiretuǵın otlı oqlar atadı.
19Jaqının aldap, zıyan keltirgennen keyin:
«Men házillesip edim», – deytuǵın adam da sonday.
20Otın tawısılsa, ot ósher,
Ósekshi bolmasa, daw sóner.
21Kómir qızıw ushın, otın ot ushın,
Urısqaq adam jánjeldi tutandırıw ushın.
22Ósekshiniń sózi sonday tatlı,
Olar adamnıń jan dúnyasına kirip alar.
23Shiyrin sózli jawız niyetli adam,
Gúmis jalatılǵan ılay ıdısqa megzer.
24Dushpan óz kegin tili artına jasırar,
Júreginde bolsa, hiyle saqlar.
25Onıń múláyim sóylegenine isenbe,
Júreginde jeti sumlıq bar onıń.
26Óshpenligin hiyle menen jasırsa da,
Jawızlıǵı xalıq jıyınında júzege shıǵar.
27Kim gór qazsa, soǵan ózi túser,
Kim joqarıǵa tas domalatsa, ózi astında qalar.
28Jalǵan til ózi jaralaǵanlardı jek kórer,
Jaǵımpaz awız apat keltirer.