‏ Proverbs 27

1Erteńgi kún menen maqtanba,
Onıń ne alıp keletuǵının bilmeyseń.
2Seni óz awzıń emes, basqa awız,
Óz tilleriń emes, ózge til maqtasın.
3Tas ta salmaqlı, qum da awır,
Aqmaq tuwdırǵan ǵázep ekewinen de awır.
4Ashıw rehimsiz, ǵázepti basqarıp bolmas,
Biraq kúnshillikke kim qarsı tura aladı?
5Ashıq eskertken,
Jasırın súyispenshilikten jaqsı.
6Dostıń eskertiwi sadıqlıq,
Dushpannıń súyiwi aldamshı.
7Toyınǵan paldan da bas tartar,
Ashqa ashshı da mazalı kóriner.
8Óz mákanın taslap, gezip ketken,
Uyasın taslap, gezip ketken qusqa megzer.
9Xosh iyisli may hám tútetki júrekti quwantar,
Dostıń shın júrekten aytqan keńesi kewilge jaǵımlı bolar.
10Ózińniń dostıńnan hám ákeńniń dostınan qol úzbe,
Basıńa is túskende aǵayinlerińe juwırma,
Uzaqtaǵı aǵayinnen jaqındaǵı qońsı artıq.
11Balam, dana bolıp júregime quwanısh baǵıshla,
Sonda meni ayıplaǵanlarǵa ne dep juwap beriwdi bilemen.
12Aqıllı qáwip-qáterdi kórip, bas sawǵalar,
Sada alǵa basıp bara berip, zálel kórer.
13Biytanısqa kepil bolǵannıń kiyimin sheship al,
Onı basqaǵa kepil bolǵanı ushın girewge uslap tur.
14Tań azannan qońsısına dawıslap alǵıs aytqan,
Ǵarǵaǵan sanalar.
15Urısqaq hayal,
Jawınlı kúni tınbay tamshılaytuǵın jawınǵa megzer.
16Onı toqtatıw samaldı basqarǵanǵa,
Yamasa qol menen maydı uslaǵanǵa uqsaydı.
17Temir temirdi qayrap ótkir qılǵanı sıyaqlı,
Adam adamdı jetik qıladı.
18Ánjirdi tárbiyalaǵan jemisin jer,
Mırzasına ǵamxorlıq etken húrmette bolar.
19Adam suwǵa qarap júzin kórgendey,
Júregine qarap ózin kórer.
20Óliler mákanı hám nabıt bolıw mákanı toyımsız bolǵanı sıyaqlı,
Adamnıń kózi de toyımsız.
21Gúmis balqıtıwxanada, altın oshaqta sınalar,
Adam maqtalǵanda sınalar.
22Aqmaqtı biyday menen kelide túyseń de,
Onnan aqmaqlıǵı ayırılmas.
23Súriwlerińniń jaǵdayın jaqsı bil,
Padalarıńa jaqsılap qara.
24Baylıq máńgilik emes,
Taj da áwladtan-áwladqa berilmes.
25Otlar orılıp, taza shóp shıǵar,
Tawdaǵı shópler de jıynap alınar.
26Sonda qoylar seni kiyindirer,
Tekeler jer satıp alıwǵa pul bolar.
27Ózińe hám úy-ishińe azıq ushın,
Eshki súti mol bolar,
Shorılarıńnıń ishiwi ushın da jeter.