‏ Proverbs 28

1Jawız adam hesh kim quwmasa da qasha berer,
Ádiller arıslanday batır bolar.
2Elde nızamsızlıq kóbeyse, basshılar kóbeyer,
Túsimpaz hám bilimli basshı bolsa, elde tártip saqlanar.
3Hálsizlerdi ezetuǵın jarlı,
Egindi jaypaytuǵın nóser jawınǵa uqsar.
4Nızamdı buzǵanlar zalımlardı maqtar,
Nızamǵa ámel qılǵanlar olarǵa qarsı turar.
5Jawız adamlar ádalattı uqpas,
Jaratqan Iyeni izlegenler hámmesin túsiner.
6Natuwrı joldan júrgen baydan,
Minsiz júrgen jarlı jaqsı.
7Nızamǵa ámel qılǵan bala – aqıllı bala,
Al jaramasqa dos bolǵan bala ákesin uyatqa qaldıradı.
8Ústeme paydası menen baylıq jıynaǵan,
Onı jarlılarǵa saqawat kórsetetuǵın adam ushın jıynaydı.
9Nızamdı esitpew ushın qulaǵın jawǵan adamnıń,
Etken duwası da jerkenishli.
10Haq adamdı joldan azǵırǵan,
Ózi qazǵan shuqırǵa ózi túser,
Minsizler jaqsılıqtı miyras qılar.
11Bay adam ózin dana sanar,
Aqıllı jarlı onı áshkara qılar.
12Ádiller ústin shıqsa, quwanısh húkim súrer,
Zalımlar lawazımǵa kóterilse, jurt bas sawǵalar.
13Qılmısın jasırǵan tabısqa erispes,
Moyınlaǵan hám olardan bas tartqan rehim tabar.
14Bárqulla Qudaydan qorqqan adam qanday baxıtlı!
Júregin qatal qılǵan apatqa ushırar.
15Jarlı xalıqqa biylik etken zalım basshı,
Aqırǵan arıslanǵa yaki ash ayıwǵa uqsar.
16Aqılsız húkimdar xalqın ezer,
Haram paydanı jek kórgenniń ómiri uzaq bolar.
17Qan tógip adam óltirgen,
Górge kirgenshe, qashıp júrer,
Oǵan hesh kim járdem bermesin!
18Minsiz júrgen qáwipsizlikte bolar,
Nadurıs joldan júrgen tosattan qular.
19Jerine tárbiya bergenniń tamaǵı toq bolar,
Bos arzıw-qıyalǵa berilgen joqshılıqqa toyar.
20Sadıq adam jarılqawǵa bay bolar,
Bayıwǵa asıqqan jazasız qalmas.
21Adamlardı alalaw jaqsı emes,
Geybir adam bir tislem nan ushın nahaqlıq qılar.
22Ishi tar adam bayıwǵa asıǵar,
Joqshılıqqa ushıraytuǵının oylamaydı da.
23Adamdı ádil áshkaralaǵan,
Aqırında, jaǵımpazǵa qaraǵanda úlken húrmetke eriser.
24«Gúna emes», – dep ata-anasınan urlaytuǵın –
Gellekeserlerdiń sherigi.
25Ashkóz jánjel shıǵarar,
Jaratqan Iyege úmit artqan toq jasar.
26Ózine isengen – aqılsız,
Danalıq penen júrgen qáwipsizlikte bolar.
27Jarlıǵa bergen kem bolmas,
Al onnan kóz jumǵan kóp ǵarǵısqa qalar.
28Zalımlar lawazımǵa kóterilse, jurt bas sawǵalar,
Olar qulasa, ádiller kóbeyer.