‏ Proverbs 29

1Jiyi eskertiwdi tıńlamay qasarısqan adam,
Kútilmegende, shıpasız ólip keter.
2Ádiller biylik etse, xalıq quwanar,
Zalımlar biylik etse, xalıq dad salar.
3Danalıqtı súygen ákesine quwanısh keltirer,
Buzıqlar menen dos bolǵan baylıǵın shashar.
4Patsha ádalatlıq penen eldi bekkemler,
Para alǵan onı qulatar.
5Jaqınına jaǵımpazlanǵan,
Onıń ayaǵı astına aw qurǵan bolar.
6Zalımnıń gúnası ózine duzaq bolar,
Ádil shadlanıp baqırar hám quwanar.
7Ádil jarlılardıń huqıqın qorǵar,
Zalımnıń buǵan bilimi jetpes.
8Surbetler qalanı kóteriliske túrtkiler,
Danalar ashıw-ızanı basar.
9Dana adam aqmaq penen qazıxanada dawlassa,
Aqmaq ashıwlanar, kúler, hesh maza bermes.
10Qanxor adamlar minsizdi jek kórer,
Haq adamlar onıń ómirine ǵamxorlıq eter.
11Aqmaq bar ashıwın tóger,
Dana ózin ózi biyler.
12Eger húkimdar jalǵan sózge qulaq salsa,
Onıń barlıq hámeldarları jawızǵa aylanar.
13Jarlı menen eziwshige ortaq nárse mınaw:
Ekewiniń de kózine Jaratqan Iye nur bergen.
14Patsha jarlılarǵa ádalatlı húkim shıǵarsa,
Onıń taxtı hárdayım bekkem bolar.
15Tayaq hám eskertiw danalıq berer,
Qarawsız qalǵan bala anasın uyatqa qaldırar.
16Zalımlar kóbeyse, nızamsızlıq kóbeyer,
Ádiller bolsa, olardıń qulaǵanın kórer.
17Balańdı tárbiyala, ol saǵan ráhát berer,
Janıńdı quwanıshqa bóler.
18Kókten ayan bolmasa, xalıq júwensiz bolar,
Nızamǵa ámel qılǵan baxıtlı bolar.
19Quldı tek sóz benen tárbiyalap bolmas,
Ol túsinedi, biraq qulaq salmas.
20Oylanbay sóyleytuǵın adamdı kórdiń be?
Sonday adamǵa qaraǵanda, aqmaqtan kóbirek úmit bar.
21Qul balalıǵınan erkeletip ósirilse,
Aqırında basıńa bále bolar.
22Ashıwlı adam jánjel shıǵarar,
Qızba adam kóp gúna qılar.
23Menmenlik adamdı jer qılar,
Kishipeyil húrmetke iye bolar.
24Urıǵa sherik bolǵan óz janın jaman kórer,
Ǵarǵısqa qalsa da, bilgenin aytıwǵa batılı jetpes.
25Adamnan qorqıw duzaqqa túsirer,
Jaratqan Iyege úmit artqan qáwipsiz bolar.
26Kópler húkimdardıń kózine túsiwdi qáler,
Biraq ádalat Jaratqan Iyeden beriler.
27Ádiller ushın nahaqlar jerkenishli,
Zalımlar ushın haq júrgenler jerkenishli.