‏ Proverbs 5

Neke hadallıǵın buzıwǵa qarsı eskertiw

1Balam, danalıǵıma itibar ber,
Men túsingen nárselerge qulaq sal.
2Solay etseń, sana-sezimiń joǵalmas,
Awzıń bilimdi saqlap qalar.

3Buzıq hayaldıń awzınan pal tamar,
Sózleri maydan da jumsaq bolar.
4Biraq onıń aqıbeti juwsanday ashshı,
Eki júzli qılıshtay ótkir.
5Ayaqları ólimge túsip barar,
Qádemleri óliler mákanına qaray jeteler.
6Ómir jolı tuwralı ol oylamas,
Qıysıq jol menen júrgenin ańǵarmas.

7Solay eken, balalarım, meni tıńlańlar,
Aytqan sózlerimnen bas tartpańlar!
8Onday hayaldan awlaq bol,
Onıń esigine de jolama.
9Bolmasa, abırayıńdı basqalarǵa,
Ómirińdi tas bawırǵa bereseń.
10Baylıǵıńnan basqalar ráhátlenip,
Miynetiń basqa úydi bayıtadı.
11Etiń súyegińe taqalıp, ómiriń aqırlaǵanda,
Ah shegip, bılay dep páriyad qılarsań:
12«Men nege násiyattı jek kórdim?
Nege júregim eskertiwdi pisent etpedi?
13Muǵallimlerimdi tıńlamadım,
Ustazlarıma qulaq aspadım.
14Sonlıqtan men jıynalǵan jámiyettiń aldında,
Iyt masqara bolayın dep qalıppan!»
15Suwdı óz suw saqlaǵıshıńnan,
Óz qudıǵıńnan shıqqan suwdan ish.
16Bulaqlarıń kóshe boylap,
Aǵın suwlarıń maydanlar boylap aqsın ba?
17Olar tek ózińdiki bolsın,
Basqalar menen bólispe.
18Bulaǵıń bereketli bolsın,
Jaslay qosılǵan qostarıńnan lázzet al.
19Ol súykimli suwın, názik kiyikke uqsaydı.
Onıń kókiregine bárqulla qanaat etip,
Bárqulla muhabbatınan lázzet al.
20Balam, saǵan tiyisli emes hayaldan lázzet alıwdıń,
Basqanıń gewdesin qushıwdıń ne keregi bar?
21Adamnıń jolları Jaratqan Iyeniń kóz aldında,
Ol onıń barlıq adımların baqlap turadı.
22Jaman adamnıń ayıplı isleri onıń ózin duzaqqa túsiredi,
Ol óz gúnalarına shırmalıp qaladı.
23Ol tárbiyasızlıqtan ólip ketedi,
Aqmaqlıǵı onı joldan shıǵaradı.