‏ Proverbs 6

Aqmaqlıq qılıwdan saq bol!

1Balam, eger birew ushın kepil bolıp,
Onıń qarızın moynıńa alsań,
2Onda sen sózińnen tutılıp,
Óz sózińniń qarmaǵına ilingeniń.
3Yaǵnıy, sol adamnıń qolına túskeniń.
Balam, onnan qutılıw ushın bılay qıl:
Bar da, ayaǵına jıǵıl, jalın.
4Kózińe uyqı berme,
Kirpik ilme.
5Ańshıdan qashqan jeyran kibi,
Qus awlawshıdan qashqan qus kibi, ózińdi qutqar.

6Háy erinshek, qumırısqanıń janına bar,
Onıń islerine qarap, danalıq úyren.
7Onıń baslıǵı da, qadaǵalawshısı da,
Húkimdarı da joq.
8Biraq ol jazda óz azıǵın toplaydı,
Jıyın-terim waqtında awqatın jıynaydı.
9Háy erinshek! Qashanǵa deyin jatpaqshısań?
Qashan uyqıńnan oyanasań?
10Biraz uyıqlap, az-maz múlgip otırsań,
Geyde qol qawsırıp, jatıp ta alsań,
11Tonawshıday bolıp joqshılıq jetip keler,
Qaraqshıday bolıp mútájlik bas salar.

12Ońbaǵan hám jawız adam jalǵan sóylep júrer,
13Kózlerin qıpılıqlatar,
Ayaqları menen belgi berip,
Barmaqları menen isharat qılar,
14Júregindegi hiyle menen jawız niyet qılıp,
Bárqulla jánjel tuwdırar.
15Sonlıqtan apat oǵan tosattan keler,
Kútilmegende, sharasız shıl-párshe bolar.
16Jaratqan Iye jek kóretuǵın altı nárse,
Hátte, Ol jerkenetuǵın jeti nárse bar:
17Menmen kóz, jalǵan sóylewshi til,
Ayıpsız qan tógetuǵın qollar,
18Jawız niyetli júrek,
Jawızlıqqa asıǵatuǵın ayaqlar,
19Ótirik sóyleytuǵın jalǵan gúwa,
Tuwısqanlar arasına ot salıwshı adam.

Neke hadallıǵın buzıwǵa qarsı jáne bir eskertiw

20Balam, ákeńniń buyrıǵın este saqla,
Anań bergen tárbiyadan bas tartpa!
21Olardı bárqulla júregińe túyip,
Moynıńa baylap júr.
22Júrgenińde, olar seni jeteler,
Uyıqlaǵanıńda, olar seni qorǵap turar,
Oyanǵanıńda, olar saǵan keńes berer.
23Bul buyrıqlar – shıra, násiyatlar – nur.
Dúzetiwshi tárbiya – ómirge jol.
24Olar seni júwensiz hayaldan,
Buzıq hayaldıń maylı tilinen qorǵaydı.
25Onıń sulıwlıǵın júregiń qumartpasın,
Kózin súzip seni aylandırıp almasın.
26Jezókshe sebepli nanǵa zar bolasań,
Al kúyewi bar hayal sebepli ómirińnen ayırılasań.
27Adam qoyınǵa ot salar da,
Kiyimin órtemes pe?
28Shoq ústinde júrer de,
Ayaǵın kúydirmes pe?
29Basqanıń hayalı menen jatqanǵa da solay boladı,
Oǵan jaqınlaǵan jazasız qalmaydı.
30Ashlıq sebepli tek qarnın toydırıw ushın urlıq qılsa,
Adamlar onı jek kórmeydi.
31Biraq ol qolǵa túsip qalsa,
Urlaǵan nársesin jeti ese qılıp tóleydi,
Hátte, úyindegi barlıq mal-múlkin beriwi múmkin.
32Buzıqshılıq qılǵan – esiwas,
Solay islegen óz janın nabıt qılar.
33Ol tayaq jep, masqara bolar,
Shermendelikten máńgige tazalana almas.
34Qızǵanıshtan kúyewin ashıw kerner,
Ósh alǵanda ayawdı bilmes.
35Hesh qanday tólemdi qabıl etpes,
Ne berseń de, alıwdı qálemes.