‏ Proverbs 7

1Balam, sózlerimdi esińde tut,
Buyrıqlarımdı júregińde saqla.
2Buyrıqlarıma ámel qıl, sonda jaqsı jasaysań,
Násiyatımdı kóz qarashıǵınday asıra.
3Olardı júzik kibi barmaǵıńa taǵıp al,
Júregińe oyıp jazıp qoy.
4Danalıqqa: «Sen meniń apamsań», – dep ayt,
Túsinikti tuwısqanım, dep ata.
5Olar seni buzıq hayaldan,
Jezókshe hayaldıń maylı tilinen qorǵaydı.

6Bir kúni úyimniń áyneginen,
Terezeden sırtqa qaradım.
7Sada jaslardıń arasında,
Aqılı tolmaǵan jas jigitti kórip qaldım.
8Ol kósheni hayal jasaytuǵın múyeshke jaqın jerden kesip ótip,
Sol hayaldıń úyine aparatuǵın jol menen ketti.
9Bul ımırt jabılǵan keshki waqıt bolıp,
Túngi qarańǵılıq shókken edi.
10Sonda buzıqlar sıyaqlı kiyingen hiyleker hayal,
Aldınan shıǵıp, jigitti kútip aldı.
11Ol úyinde turmaytuǵın,
Wayraqı hám júwensiz bolıp,
12Birese kóshede, birese maydanda,
Múyeshlerde jigitlerdi awlap turadı.
13Ol jigitti uslap alıp, súydi,
Beti búlk etpey oǵan bılay dedi:
14«Búgin tatıwlıq qurbanlıǵın berip,
Bergen wádemdi orınladım.
15Sonlıqtan seni kútip alıwǵa shıqtım,
Seni izlep, mine, tawıp ta aldım!
16Túrli reńli Mısır tawarlarınan,
Tósegimdi qaplap, tósedim.
17Jataq jayıma xosh iyisli mirra,
Aloe hám korica septim.
18Qáne kel, tań atqansha, muhabbat lázzetin tatıp,
Onnan ráhátleneyik.
19Úyde kúyewim joq,
Ol alıs saparǵa ketti.
20Ol gúmis tolı shıjlanın da alıp ketti,
Ay tolǵansha qaytıp kelmeydi».
21Hayal jıllı sózler menen jigitti aylandırıp,
Maylı tili menen joldan urdı.
22Sol waqıtta-aq, jigit oǵan erip ketti.
Jigit soyılıwǵa baratırǵan buǵaǵa,
Duzaqqa ayaq basıp atırǵan suwınǵa uqsar edi.
23Oq bawırın tesip ótpegenshe,
Duzaqqa taslanǵan qus sıyaqlı,
Ólimge baratırǵanın bilmes edi.

24Solay eken, balalarım, meni tıńlańlar,
Aytqan sózlerime qulaq salıńlar!
25Júregińiz sonday hayaldıń jolına burılmasın,
Onıń soqpaqları boylap adasıp júrmeńler.
26Ol kóplerdi jaradar etip qulattı,
Sansız adamlar onıń qolınan qaza taptı.
27Onıń úyi óliler mákanına jeteleytuǵın,
Ólimge alıp túsetuǵın jol.