‏ Proverbs 8

Danalıqtı tıńla!

1Shaqırıp atırǵan Danalıq emes pe?
Dawıslap turǵan túsinik emes pe?
2Ol jol shetindegi bálentliklerdiń ústinde,
Dárbent jollarda turadı.
3Ol qala dárwazalarınıń aldında,
Qalaǵa kirer awızda turıp jar saladı:
4«Háy adamlar, men sizlerdi shaqırıp turman,
Shaqırıǵım adam balasına qaratılǵan!
5Sadalar, uzaqtı kóriwdi úyreniń,
Aqmaqlar, túsinikke iye bolıń!
6Tıńlańlar, áhmiyetli nárselerdi aytpaqshıman,
Haqıyqattı bayan etpekshimen.
7Tilim haqıyqattı sóyleydi,
Awzım jalǵannan jerkenedi.
8Awzımnan shıqqan hár bir sóz haqıyqat,
Onda hiyle hám jalǵan joq.
9Sanalıǵa barlıǵı ayan,
Bilimdi iyelegenge bári durıs.
10Gúmisti emes, meniń násiyatımdı al,
Sap altın ornına bilim al.
11Danalıq yaqıttan da qımbat,
Ańsaǵan hesh nárseń oǵan teń kelmes.

12Men – Danalıqpan, Aqıl-parasat penen birge jasayman,
Bilim hám sana-sezim mende bar.
13Jaratqan Iyeden qorqıw – jamanlıqtan jerkeniw.
Men menmenlik hám tákabbirlikti,
Jawızlıq jolın hám ótirik sózdi jek kóremen.
14Mende jaqsı keńes bar, mende úgit-násiyat bar,
Men túsinikpen, kúsh-quwat ta mende bar.
15Men arqalı patshalar biylik eter,
Húkimdarlar ádil húkim shıǵarar.
16Jer betindegi barlıq húkimdarlar,
Ádil basqarıp otırǵan hámme aqsúyekler men arqalı basqarar.
17Meni súygenlerdi men de súyemen,
Meni ıqlas penen izlegenler, meni tabadı.
18Mende baylıq hám dańq-ataq bar,
Tawısılmas baylıq hám ádalat mende bar.
19Beretuǵın jemisim altınnan, sap altınnan da jaqsı,
Men beretuǵın payda saylandı gúmisten de joqarı.
20Men ádillik jolınan,
Ádalat soqpaqlarınan júremen.
21Meni súygenlerge baylıq sıylap,
Olardıń qaznaların toltıraman.

22Jaratqan Iye Óz isin baslamastan aldın,
Óz jolınıń bası retinde meni jarattı.
23Eń basta, dúnya jaratılmastan aldın,
Men tayınlanǵan edim.
24Ele túpsiz teńiz de bolmaǵan,
Mol suwlı bulaqlar da kóz ashpaǵan waqıtta,
Men tuwılǵan edim.
25Ele tawlar ornatılmastan aldın,
Tóbelerden de burın men tuwıldım.
26Ol waqıtta Ol ele jerdi de, dalalardı da,
Dúnyanıń birinshi topıraǵın da jaratqan joq edi.
27Ol aspandı ornatqanda,
Tereń teńiz júzine jiyek sızǵanda, men sol jerde edim.
28Joqarıǵa bultlardı qoyǵanda,
Jer astı bulaqlarına tiykar salǵanda,
29Suwlar shegaradan shıǵıp ketpesin dep,
Teńizge kórsetpe bergende,
Jerdiń tiykarın belgilegende,
30Men Onıń janında usta boldım.
Hár kúni Onı quwantıp,
Onıń aldında shadlanar edim.
31Ol jaratqan dúnyada kewlimdi kóterer edim,
Adam balası meniń quwanıshım edi.

32Solay eken, balalarım, meni tıńlańlar,
Jolımdı tutqanlar qanday baxıtlı!
33Násiyatımdı tıńlap, dana bolıńlar,
Hesh qashan onnan júz burmańlar!
34Hár kúni dárwazam aldında sergek turatuǵın,
Esigim aldında kútip turatuǵın,
Meni tıńlaytuǵın adam qanday baxıtlı!
35Meni tapqan ómirdi tabadı,
Jaratqan Iyeniń miyrimine erisedi.
36Al Meni qoldan shıǵarǵan ózine zıyan keltiredi,
Meni jek kóretuǵınlardıń hámmesi ólimdi súyedi».