‏ Proverbs 9

Danalıqtıń hám aqmaqlıqtıń mirát etiwi

1Danalıq ózine úy qurıp aldı,
Onıń jeti sútinin jonıp qoydı.
2Ol malların soyıp, sharap tayarlap,
Dasturxan jaydı.
3Ol óz xızmetshi hayalların jollap,
Qalanıń biyik jerlerinde jar saldırdı:
4«Kim sada bolsa, berman kelsin!»
Al aqıl-esi kemlerge bılay dedi:
5«Kelińler, nanımnan jep,
Men tayarlaǵan sharaptan ishińler.
6Nadanlıqtı taslap, jasańlar,
Aqıl-parasattıń jolınan júrińler».

7Surbetke násiyat bergen masqara bolar,
Jamandı áshkaralaǵanǵa min taǵılar.
8Surbetti áshkaralama, ol seni jek kórip qalar,
Dananı áshkarala, ol seni súyip qalar.
9Danaǵa úyret, ol ele de danaraq bolar,
Ádilge tálim ber, ol bilimin arttırar.
10Jaratqan Iyeden qorqıw – danalıqtıń bası,
Muxaddes Qudaydı tanıw – aqıl-parasat.
11Men – danalıq arqalı ómiriń uzayar,
Jasıńa jas qosılar.
12Eger dana bolsań, ózińe payda,
Surbet bolsań, jábirin óziń tartarsań.

13Aqmaqlıq – ǵawǵalı hayal,
Ol nadan, hesh nárseni bilmeydi.
14Ol úyiniń esigi aldında,
Qalanıń biyik jerinde otırıp alıp,
15Joldan ótip baratırǵanlardı,
Óz jolı menen ketip baratırǵanlardı shaqırıp:
16«Kim sada bolsa, berman kelsin!» – deydi.
Al jarımeslerge bılay deydi:
17«Urlap ishilgen suw júdá tatlı,
Jasırıp jelingen nan sonday mazalı».
18Biraq sadalar bilmeydi burın shaqırılǵanlardıń,
Óliler mákanınıń túbinde ólip jatırǵanın.