‏ Proverbs 1

Hikmetlerdiń maqseti

1Bular Izraildıń patshası Dawıttıń ulı Sulaymannıń hikmetleri:

2Bul hikmetlerdiń maqseti mınaw:
Danalıqtı hám násiyattı úyretiw,
Aqıllı sózlerdi túsindiriw;
3Tuwrı jasaw qaǵıydaların,
Ádillik, ádalatlıq hám hadallıqtı ózlestiriw;
4Sadalarǵa tereń túsinik,
Óspirimlerge bilim hám sana beriw.

5Danalar tıńlap, bilimine bilim qosadı,
Aqıllılar dana keńes aladı.
6Usılayınsha olar naqıl hám hikmetlerdi,
Danıshpanlardıń sózleri menen jumbaqların túsinedi.

7Jaratqan Iyeden qorqıw – danalıqtıń bası.
Tek aqılsızlar ǵana danalıq hám násiyattı jek kóredi.

Azǵırıwlardan saq bol!

8Balam, ákeńniń násiyatlarına qulaq sal,
Anań bergen tálimnen bas tartpa!
9Olar basıńa ájayıp taj,
Moynıńa monshaq boladı.
10Balam! Eger gúnakarlar seni azǵırmaqshı bolsa,
Olarǵa kónbe.
11Eger olar: «Bizler menen júr,
Qan tógiw ushın buqqıda jatayıq,
Sebepsizden sebepsiz biygúnanı ańlıyıq.
12Olardı óliler mákanı kibi tiriley,
Tuńǵıyıqqa túskenler kibi pútinley jutayıq.
13Barlıq qımbatbaha zatların alayıq,
Úylerimizdi oljaǵa toltırayıq.
14Bizler menen táwekelge bel bayla,
Bar baylıǵımız ortaq boladı», – dese,
15Balam, olar menen joldas bolma,
Olardıń jolınan awlaq bol!
16Olardıń ayaqları jawızlıqqa talpınar,
Qan tógiwge asıǵar.
17Hátte, quslar da,
Kóz aldında qurılǵan awǵa túspes.
18Al sol adamlar óz qanın tógiw ushın buqqıda jatadı,
Ózleriniń janın ózleri ańlıydı.
19Haram tabısqa qumardıń aqıbeti sonday boladı,
Sol qumarlıq haram tabıs iyesiniń basın jalmaydı.

Danalıqtı tıńla!

20Danalıq kóshelerde jar salıp,
Maydanlarda dawıslap baqıradı.
21Shawqımlı kósheniń basında qıshqırıp,
Qala dárwazalarınıń kirer awzında óz sózin aytadı:
22«Háy, sadalar! Sadalıǵıńızdı qashanǵa deyin súymekshisiz?
Surbetler qashanǵa deyin mazaqlawdan zawıq aladı?
Aqmaqlar qashanǵa shekem bilimdi jek kóredi?
23Qáne, meniń áshkaralaǵanımnan dúzelseńiz edi!
Sizlerdi ruwxıma toltırıp,
Sózlerimdi bildirer edim.
24Sizlerdi shaqırdım, meni tıńlawdan bas tarttıńız,
Qolımdı sozdım, názer awdarǵan bolmadı.
25Sizler meniń barlıq keńeslerimdi mensinbedińiz,
Meniń áshkaralawlarımdı qabıl etpedińiz.
26Sonıń ushın men de apatqa ushıraǵanıńızda, ústińizden kúlemen,
Húreyińiz ushqanda, mazaq qılaman.
27Qorqınısh dawılday bastırıp kelgende,
Apatshılıq quyınday dúbegende,
Qayǵı hám hásiret basıńızǵa túskende,
28Meni shaqırasız, men de juwap bermeymen,
Meni izleysiz, biraq tappaysız.
29Óytkeni sizler bilimdi jek kórdińiz,
Jaratqan Iyeden qorqıwdı maqul kórmedińiz.
30Keńeslerimdi qabıl qılmadıńız,
Áshkaralawlarımdı kózge ilmedińiz.
31Sonıń ushın, tutqan jolıńızdıń ashshı miywelerin jep,
Óz sumlıqlarıńızǵa toyınasızlar.
32Sadanıń ójetligi ózin óltiredi,
Aqmaqtıń biyǵamlıǵı onı qurtadı.
33Al meni tıńlaǵanlar qáwipsiz jasap,
Jamanlıqtan qorqpay, tınısh boladı».