‏ Proverbs 12

1Násiyattı súygen bilimdi súyer,
Eskertiwdi jek kórgen – nadan.
2Aq kewil adamǵa Jaratqan Iyeniń kewli tolar,
Niyeti buzıqtı jazaǵa húkim qılar.
3Adam jawızlıq penen kámal tappas,
Ádildiń negizi terbelmes.
4Jaqsı hayal – kúyewiniń tajı,
Kúyewin uyatqa qaldıratuǵın hayal – súyegindegi irińli jara.
5Ádildiń oy-niyeti ádalatlı,
Zalımnıń keńesi aldamshı.
6Zalımnıń sózi – qan tógiw ushın duzaq,
Ádil adamnıń sózi qan tógiliwden qutqarar.
7Zalım qulap, joq bolar,
Ádildiń úyi bekkem turar.
8Adamdı aqılına qarap maqtar,
Niyeti buzıq kemsitiler.
9Nanǵa zar bola tura, kókirek kóterip júrgennen,
Qarapayım bolıp, xızmetshi bolǵan jaqsıraq.
10Ádil óz malınıń da janın ayar,
Zalımnıń rehimi de jawızlıq.
11Jerine tárbiya bergenniń tamaǵı toq,
Bos arzıw-qıyalǵa berilgenniń aqılı joq.
12Zalım adam jawız adamnıń oljasın kúser,
Ádildiń tamırı en jayar.
13Zalım gúnalı tili sebepli tutılar,
Ádil báleden shıǵıp keter.
14Adam óz sóziniń miywesinen jaqsılıqqa eriser,
Qollarınıń miyneti de óz haqısın alar.
15Aqılsızdıń jolı óz kózine durıs bolıp kóriner,
Dana adam másláhátke qulaq salar.
16Aqılsızdıń ashıwı dárriw betine shıǵar,
Aqıllı shekken jábirin jasırar.
17Tuwrı sóyleytuǵın gúwa haqıyqattı,
Jalǵan gúwa ótirikti aytar.
18Oylanbay aytılǵan sóz qılıshtay jaraqatlar,
Dananıń sózi shıpa berer.
19Íras sóyleytuǵın til máńgi turar,
Ótirikshi til tek bir sátlik.
20Jaman niyetlilerdiń júreginde jalǵan,
Tınıshlıqtı niyet etkenniń júreginde shadlıq bar.
21Haq adamǵa hesh qanday bále kelmes,
Nahaqtıń bası báleden shıqpas.
22Ótirikshi til Jaratqan Iyege jerkenishli,
Tuwrı is isleytuǵınlarǵa Onıń kewli tolar.
23Aqıllı adam bilimin jasırar,
Aqmaqtıń júregi nadanlıǵın járiya qılar.
24Miynetkesh qol biylik qılar,
Erinshek márdikarǵa alınar.
25Júrektegi uwayım adamdı shóktirer,
Jaqsı sóz onı quwantar.
26Ádil adam jaqınına jol kórseter,
Zalım adamnıń jolı olardı adastırar.
27Erinshek tutqan ańın pisirip jemes,
Talapshań qımbatbaha baylıqqa iye bolar.
28Ádillik jolında ómir bar,
Onıń soqpaqlarında ólim joq.