‏ Proverbs 13

1Aqıllı perzent ákesiniń násiyatına qulaq salar,
Surbet perzent keyigenge qulaq aspas.
2Jaqsı adam awzınıń miywesinen jaqsılıq tatar,
Opasızlar jawızlıqqa talpınar.
3Tilin tıyǵan óz ómirin saqlap qalar,
Tiline erk bergen ózin nabıt qılar,
4Erinshek qálese de, hesh nárse ala almas,
Talapshańnıń tilegi aqırına deyin orınlanar.
5Ádil adam ótirik sózdi jek kórer,
Zalım uyatsızlıq qılıp, óziniń abırayın tóger.
6Ádillik minsizdi jolında qorǵar,
Zalımlıq gúnakardı qulatar.
7Birew hesh nársesi bolmasa da, ózin bay qılıp kórseter,
Basqası baylıǵı mol bolsa da, ózin jarlı qılıp kórseter.
8Baylıǵı menen adam óz janın satıp alar,
Jarlı bolsa qáwip-qáterden awlaq bolar.
9Ádillerdiń nurı jarqırap jaynap turar,
Zalımlardıń shırası da óship qalar.
10Menmenlik daw-jánjel keltirip shıǵarar,
Keńeske qulaq salǵanlarda danalıq bolar.
11Ańsat tabılǵan baylıq tez tawısılar,
Miynet penen jıynaǵan baylıǵın kóbeyter.
12Uzaq waqıt orınlanbaǵan úmit júrekti túńildirer,
Orınlanǵan tilek bolsa, ómir teregine uqsar.
13Násiyattı mensinbegen ózine zıyan keltirer,
Buyrıqlardı húrmet etken sıy alar.
14Danalar tálimi – ómirdiń bulaǵı,
Ol adamdı ólim duzaǵınan qutqarar.
15Jaqsı aqıl unamlı qılar,
Opasızdıń ómiri wayran bolar.
16Hár qanday aqıllı adam bilim menen is tutar,
Aqılsız óziniń aqmaqlıǵın kórseter.
17Jaman shabarman apatqa ushırar,
Isenimli elshi shıpa alıp keler.
18Násiyatqa qulaq salmaǵan joqshılıq penen shermendelikke ushırar,
Eskertiwdi qabıl etkenler húrmet-izzetke bólener.
19Orınlanǵan tilek janǵa jaǵımlı,
Aqılsız jamanlıqtan waz keshiwdi jek kórer.
20Dana menen dos bolǵan dana bolar,
Aqılsız benen dos bolǵan apatqa ushırar.
21Baxıtsızlıq gúnakardı quwıp júrer,
Abadanlıq ádillerdiń sıyı bolar.
22Jaqsı adam aqlıq-shawlıqlarına da miyras qaldırar,
Gúnakarlardıń baylıǵı ádiller ushın jıynalar.
23Jarlınıń atızı da mol biyday beriwi múmkin,
Biraq ádalatsızlıq sebepli wayran bolar.
24Jazalawǵa ayaǵan balasın súymeydi,
Balasın súygen balalıqtan tárbiyalaydı.
25Ádil toyǵanınsha jer,
Zalımnıń qarnı ash qalar.