‏ Proverbs 2

Danalıqtıń qádiri

1Balam! Eger sen sózlerimdi qabıl qılıp,
Buyrıqlarımdı júregińde saqlasań,
2Danalıqqa qulaq túrip,
Túsinikke júregińdi ashsań,
3Eger aqıl-parasattı shaqırıp,
Túsinikke dawıslap jalbarınsań,
4Onı gúmis kibi izlep,
Kómilgen ǵáziyne kibi aqtarsań,
5Sonda sen Jaratqan Iyeden qorqıwdıń ne ekenin túsinip,
Qudaydıń kim ekenin bileseń.
6Danalıqtı Jaratqan Iye berer,
Bilim hám túsinik Onıń awzınan shıǵar.
7Ol haqlar ushın tabıs sıylap,
Minsizler ushın qalqan bolar.
8Ol ádalatlıq jolların qorıp,
Ózine sadıqlardıń jolların qorǵar.
9Sonda sen ádillik hám ádalatlıqtı uǵıp,
Hadal hám tuwrı joldıń ne ekenin túsinerseń.
10Júregiń danalıqqa tolıp,
Kewliń bilimnen zawıq alar.
11Aqıl-parasat seni aman saqlap,
Durıs túsinik seni qorǵar.
12Danalıq seni jawızlardıń jolınan,
Jalǵan sóylewshilerden,
13Qarańǵılıq jolınan júriw ushın,
Tuwrı joldı taslap ketkenlerden,
14Jamanlıq islep quwanıp,
Jawızlıqtıń buzǵınlıǵınan lázzet alatuǵınlardan,
15Teris jolǵa túsip,
Óz jollarınan adasqanlardan saqlar.

16Danalıq seni buzıq hayaldan,
Jezókshe hayaldıń maylı tilinen saqlar.
17Ol jaslay qosılǵan kúyewin taslap ketken,
Qudaydıń aldında dúzgen kelisimin umıtqan.
18Onıń úyi ólimge,
Jolları óliler aldına alıp baradı.
19Oǵan barǵanlar qaytıp kelmes,
Ómir jolına qayta túspes.
20Sonlıqtan jaqsılardıń jolınan júr,
Ádillerdiń jolın bekkem tut.
21Haqlar jer betin mákan qılar,
Minsizler sol jerde qalar.
22Jamanlar jer betinen qırıp taslanar,
Opasızlar túp-tamırı menen joq qılınar.