‏ Proverbs 3

Jaslarǵa másláhát

1Balam, úyretkenlerimdi umıtpa,
Buyrıqlarımdı júregińde saqla!
2Olar ómir jasıńdı uzaytıp,
Mol tınıshlıq sıylaydı.
3Súyispenshilik hám sadıqlıq hasla seni tárk etpesin,
Olardı moynıńa taǵıp,
Júregińe oyıp jazıp qoy.
4Sonda Qudaydıń hám adamlardıń názerinde,
Miyrim hám abırayǵa iye bolasań.
5Shın júrekten Jaratqan Iyege úmit bayla,
Óz aqıl-parasatıńa súyenip júrme.
6Islegen hár bir isińde Jaratqan Iyeni tanıp bil,
Ol seniń jollarıńdı tuwrılap turar.
7Ózińdi danıshpanman dep sanama,
Jaratqan Iyeden qorq, jamanlıqtan awlaq júr.
8Bul deneńe salamatlıq,
Súyeklerińe azıq boladı.
9Mal-múlkińnen hám hámme zúráátińniń dáslepki óniminen berip,
Jaratqan Iyege húrmet kórset.
10Sonda telekleriń dánge tolıp tasıp,
Iskenjeleriń taza sharapqa toladı.
11Balam, Jaratqan Iyeniń tárbiyasına itibarsız qarama,
Ol áshkaralaǵanda júregińe awır alma.
12Áke jaqsı kórgen ulın jazalaǵanı sıyaqlı,
Jaratqan Iye de kimdi súyse, sonı áshkaralaydı.

Danalıqtıń qunı

13Danalıqtı tapqan,
Túsinikke iye bolǵan adam qanday baxıtlı!
14Óytkeni danalıq gúmisten qunlıraq,
Onıń paydası altınnan da joqarı.
15Danalıq hasıl tastan da qımbat,
Qumartqan hesh bir nárseń oǵan teń kelmes.
16Uzaq ómir onıń oń qolında,
Baylıq hám dańq sol qolında.
17Danalıqtıń jolları jaǵımlı jollar,
Onıń barlıq soqpaqları tınıshlıqqa aparar.
18Danalıq – onı iyelegen adam ushın ómir teregi,
Onı bekkem uslaǵan qanday baxıtlı!

19Jaratqan Iye danalıq penen jerdiń tiykarın saldı,
Túsinik penen kóklerdi bekkem ornattı.
20Onıń bilimi menen tuńǵıyıqtıń kózleri ashıldı,
Bultlar shıq túsirdi.
21Balam! Saw pikir hám durıs túsinikti saqla,
Olardı názerińnen qashırma.
22Olar janıńa ómir,
Moynıńa ájayıp monshaq boladı.
23Sonda ómir jolıńda qáwipsiz júreseń,
Ayaqlarıń da súrnikpeydi.
24Jatqanıńda qorqpaysań,
Uyıqlaǵanıńda uyqıń tınısh boladı.
25Tosattan bolatuǵın apattan,
Nahaqlardıń basına túsetuǵın báleden qorqpaysań.
26Jaratqan Iye seniń súyenishiń bolıp,
Ayaqlarıńdı duzaqqa túsiwden saqlaydı.

27Qolıńnan keletuǵın waqıtta,
Mútájlerden járdemińdi ayama.
28Qolıńda bar bola tura jaqınıńa:
«Erteń kel, sonda beremen», – deme.
29Biyǵam janıńda jasap atırǵan qońsıńa,
Jamanlıq oylama.
30Ózińe jamanlıq qılmaǵan adam menen,
Sebepsiz jánjellespe.
31Zorlıq islewshige háwes qılma,
Onıń jollarınıń birde birewin tańlama.
32Jaratqan Iye azǵırıwshılardan jerkenedi,
Haq adamǵa jaqın boladı.
33Jaratqan Iye zalımnıń úyin náletleydi,
Ádillerdiń mákanın jarılqaydı.
34Ol surbetlerdiń ózlerin mazaq qıladı,
Kishipeyillerge miyrim kórsetedi.
35Danalar dańq-ataqtı,
Aqılsızlar shermendelikti miyras etip aladı.