‏ Proverbs 4

Danalıqtıń artıqmashlıǵı

1Balalarım, ákeńizdiń násiyatlarına qulaq salıń!
Aqıl-parasattı iyelewge itibar beriń.
2Men sizlerge jaqsı tálim beremen,
Úyretkenlerimnen júz burmańlar.
3Men de ákemniń úyinde bala boldım,
Kóziniń qarası, anamnıń jalǵızı edim.
4Ákem maǵan úyretip, bılay der edi:
«Sózlerimdi júregińe bekkem jayla,
Buyrıqlarımdı orınla, sonda jaqsı jasaysań.
5Danalıqtı hám aqıl-parasattı iyele,
Sózlerimdi umıtpa, olardan júz burma.
6Danalıqtan ayırılma, ol seni qorǵaydı,
Onı súy, ol seni aman saqlaydı.
7Eń baslısı – danalıq, danalıqtı iyele,
Bar iyeligińdi berip bolsa da, aqılǵa iye bol.
8Onı joqarı bahala, ol seni mártebeli qıladı,
Oǵan jabısıp alsań, ol seni abırayǵa eristiredi.
9Danalıq basıńa ájayıp gúl sheńber,
Sawlatlı bir taj kiydiredi».

10Balam, tıńla hám sózlerimdi qabıl et,
Sonda ómir jasıń uzaq boladı.
11Men saǵan danalıq jolın úyrettim,
Seni tuwrı soqpaqlardan jeteledim.
12Júrgenińde, adımıń tosqınlıqqa ushıramaydı,
Juwırǵanıńda súrnikpeyseń.
13Násiyatıma bekkem ámel qıl, onnan ayırılma,
Onı saqla, ol – seniń ómiriń.
14Zalımlardıń soqpaǵınan,
Jawızlardıń jolınan júrme.
15Onnan bas tart, ol joldan júre górme,
Onnan awlaq bolıp, burılıp ket.
16Olar jawızlıq islemese, uyıqlay almaydı,
Birewdi qulatpasa, uyqısı qashadı.
17Olar nızamsızlıq arqalı nan jep,
Jawızlıq arqalı sharap ishedi.
18Ádildiń jolı tań shuǵlasına uqsaydı,
Ol túske deyin jarqıraǵan sayın jarqıraydı.
19Zalımnıń jolı túnekke uqsaydı,
Olar nege súrnigip qulaytuǵının bilmeydi.
20Balam, sózlerime dıqqat qoy,
Aytqanlarıma qulaq túr.
21Sózlerimdi názerińnen qashırma,
Olardı júrek tórinde saqla.
22Olar ózin tapqanlarǵa ómir sıylaydı,
Pútkil denesine densawlıq beredi.
23Eń baslısı, bar kúshiń menen júregińdi qorǵa,
Ol ómir bulaǵı.
24Awzıńnan jalǵan sóz shıqpasın,
Tilińdi ótirik sózden tıy.
25Kózleriń alǵa tuwrı qarasın,
Názeriń aldıǵa tigilgen bolsın.
26Qádemińdi oylap bas,
Pútkil jollarıń bekkem bolsın.
27Ońǵa da, solǵa da qayırılma,
Ayaǵıńdı jawızlıqtan awlaq tut.