‏ Psalms 108

1Atqarıwshılardıń jetekshisi ushın. Dawıttıń jırı
Men alǵıslap júrgen Quday,
Únsiz qalma!
2Jawızlar hám ótirikshiler maǵan qarsı awzın ashıp,
Jalǵanshı tilleri menen meni aldaydı.
3Jerkenishli sózler menen meni qorshap,
Sebepsiz maǵan qarsı hújim qıladı.
4Súyispenshiligime qarsı ayıp taǵadı,
Biraq duwa etiwdi dawam etemen.
5Jaqsılıǵıma jamanlıq qaytaradı,
Súyispenshiligim ushın meni jek kóredi.

6Jawız adamdı olarǵa qarsı qoy,
Oń jaǵında ayıplawshı birew tursın!
7Húkim etilgende, olar ayıplı bolsın,
Olardıń duwası gúna sanalsın!
8Olardıń ómiri qısqa bolsın,
Isleytuǵın wazıypasın basqa birew alsın!
9Balaları jetim,
Hayalları jesir bolıp qalsın!
10Balaları gezende bolıp, tilenshilik qılsın,
Qarabaqanaǵa aylanǵan úylerinen ketip, nan izlesin!
11Mal-múliklerin sútxorlar iyelesin,
Jıynap-tergenlerin jat adamlar tartıp alsın!
12Hesh kim olarǵa jaqsılıq qılmasın,
Jetimlerine hesh kim rehim etpesin!
13Olardıń áwladı joq bolsın,
Bir áwladtan soń atları óship qalsın!
14Olardıń ata-babalarınıń gúnaların,
Jaratqan Iye, Sen eske al,
Analarınıń gúnası óshirilmesin!
15Gúnaları hámme waqıtta, Jaratqan Iye, Seniń aldıńda tursın,
Olardıń atların jer júzinen joq et!

16Sebebi olar jaqsılıq qılıwǵa urınbadı,
Biyshara hám mútájlerdi quwdalap,
Úmitsizlikke túskenlerdi óltirdi.
17Basqalardı náletlewdi jaqsı kórdi,
Endi sol náletler óz basına tússin!
Hesh kimdi jarılqawdı xosh kórmedi,
Endi jarılqaw olardan uzaq bolsın!
18Náletti olar kiyimdey etip kiyip aldı,
Náletler suwday ishine kirsin,
Mayday súyeklerine sińsin!
19Kiyim kiygendey, náletke oranıp alsın,
Onı hár kúni beline qayıs qılıp taqsın!
20Jaratqan Iye usılay etip qaytarsın meni ayıplawshılarǵa,
Maǵan qarsı jaman sóz aytıwshılarǵa!

21Al Quday Iye,
Óz atıń ushın maǵan járdem ber,
Súyispenshiligiń iygilikli, meni qutqar!
22Men biyshara hám mútájben,
Ishimde júregim jaralanǵan.
23Keshki kóleńkedey joq bolıp baratırman,
Qaǵıp jiberildim shegirtke sıyaqlı.
24Oraza tutıwdan dizelerimde dárman qalmadı,
Azıp, súyek bolıp qaldım.
25Meni ayıplap atırǵanlardıń aldında júzim tómen boldı,
Meni kórgende, olar basın shayqaydı!

26Maǵan járdem ber, Qudayım Jaratqan Iye,
Súyispenshiligiń haqı qutqar meni!
27Olar bilsin bul iste Seniń qolıń bar ekenin,
Bunı Seniń islegenińdi, Jaratqan Iye!
28Meyli, olar meni náletlesin, biraq Sen meni jarılqaysań,
Maǵan hújim qılǵanda, olar shermende bolsın,
Qulıń bolǵan men shadlanaman.
29Meni ayıplawshılar kiyim kiygendey uyatqa bólensin,
Shapan jamılǵanday, shermendelikti jamılsın!

30Jaratqan Iyeni kóp táriyipleymen,
Jámáát ishinde Onı alǵıslayman.
31Ol mútáj adamnıń oń tárepinde turadı,
Onıń janına qarsı húkim shıǵaratuǵınlardan qutqaradı.