Psa 94 | KaaIBT22L | STEP | Keliń, Jaratqan Iyege shadlanıp baqırayıq, Qutqarıwshı jartasqa shadlanayıq.

‏ Psalms 94

1 Keliń, Jaratqan Iyege shadlanıp baqırayıq,
Qutqarıwshı jartasqa shadlanayıq.
2 Alǵıs aytıp, Onıń aldına keleyik,
Oǵan bálent dawıs penen qosıq aytayıq!
3 Jaratqan Iye ullı Qudaydur,
Barlıq qudaylardan ústem turıwshı ullı patshadur.
4 Jerdiń tuńǵıyıqları Onıń qolında,
Taw shıńları da Oǵan tiyisli.
5 Teńiz Onıki, onı Ózi jarattı,
Qurǵaq jerdi de Óz qolı menen dóretti.

6 Keliń, tájim qılıp, iyileyik,
Bizlerdi jaratqan Jaratqan Iyeniń aldında dize búgeyik.
7 Ol bizlerdiń Qudayımız,
Bizler Onıń baǵıp atırǵan xalqımız,
Qolınıń astındaǵı qoylarımız.

Eger búgin Onıń dawısın esitseńiz,
8 Meribada, sol kúni shóldegi Massada bolǵanı sıyaqlı ^{▼▼ Shıǵ 17:1-7; San 20:1-13.},
Tas qılmańlar júreklerińizdi.
9 Islegen islerimdi kórgen bolsa da,
Ata-babalarıńız sol jerde Meni sınap, tekserdi.
10 Qırıq jıl dawamında ol áwladtan jerkenip ^{▼▼ San 14:33-34.}, bılay dedim:
«Olar júrekleri azǵırılǵan xalıq,
Meniń jollarımdı bilmeydi».
11 Sonlıqtan ǵázeplenip, bılay dep ant ishtim:
«Olar Meniń tınıshlıq beretuǵın mákanıma hasla kirmeydi!» ^{▼▼ San 14:20-23.}