Psa 1 | KaaIBT22L | STEP | Qanday baxıtlı mınaday adam: Napáklerdiń másláháti menen júrmeytuǵın, Gúnakarlardıń jolına ayaq baspaytuǵın, Surbetlerdiń arasında otırmaytuǵın.

‏ Psalms 1

1 Qanday baxıtlı mınaday adam:
Napáklerdiń másláháti menen júrmeytuǵın,
Gúnakarlardıń jolına ayaq baspaytuǵın,
Surbetlerdiń arasında otırmaytuǵın.
2 Al ol Jaratqan Iyeniń kórsetpelerinen ráhátlener,
Kúni-túni kórsetpeleriniń ústinde oy juwırtar.
3 Ol aǵın suw boyına egilgen miywe aǵashına megzer,
Miywesin óz máwsiminde berer,
Japıraqları quwrap qalmas,
Ol ne islese de, tabısqa eriser.

4 Al napákler bolsa bunday emes,
Olar samal ushırǵan qawıqqa uqsar.
5 Sonıń ushın ádillik bolǵan jerde napákler tura almas,
Haqlardıń jámiyetinde gúnakarlarǵa orın bolmas.
6 Jaratqan Iye haqlardıń jolın gúzeter,
Al nahaqlardıń jolı ólimge jetekler.