‏ Psalms 101

1Ezilgen biysharanıń Jaratqan Iyege óz dártin aytıp, etken duwası
2Jaratqan Iye, duwamdı esit,
Páriyadım Saǵan jetip barsın.
3Qıyın kúnimde júzińdi mennen jasırma,
Qulaq sal meniń dawısıma,
Seni shaqırǵanımda, tez juwap ber maǵan.

4Ómirim tútindey joq bolıp,
Súyeklerim ottay janıp atır.
5Júregim quwraǵan shóptey bolıp qaldı,
Awqat jewdi de umıttım.
6Dad salıp, ahıw-nala shekkenlikten,
Etim súyeklerime jabısqan.
7Men qula dúzdegi uzaqshaǵa uqsayman,
Qarabaqanaǵa aylanǵan jerlerdegi bayıwlı sıyaqlıman.
8Kózime uyqı kelmeydi,
Tam basındaǵı jalǵız bir qus yańlıman.
9Kúni boyı dushpanlarım meni mazaq qıladı,
Meni mazaqlawshılar atımdı nálet aytıw ushın qollanadı.

10Nan ornına kúl jep atırman,
Kóz jasımdı ishimligime aralastıraman.
11Seniń ashıw hám qáháriń sebepli usınday qılıp atırman.
Awa, Sen meni kóterip, ılaqtırdıń.
12Keshki waqıttaǵı kóleńkege uqsaydı ómirim,
Shóp sıyaqlı, sarǵayıp solıp atırman.

13Biraq Sen, taxtıńda máńgi otırasań, Jaratqan Iye,
Seniń dańqıń áwladtan-áwladqa dawam etedi.
14Ornıńnan turıp, Sionǵa rehim et,
Oǵan miyrim-shápáát kórsetetuǵın waqıt keldi,
Belgilengen waqıt-saat jetip keldi.
15Qullarıń onıń tasların da qádirleydi,
Onıń topıraǵı ushın janları ashıydı.
16Milletler Jaratqan Iyeniń atınan,
Jer júzindegi patshalar Onıń saltanatınan qorqadı.
17Jaratqan Iye Siondı qayta tikleydi,
Óz saltanatı menen payda boladı.
18Gedeylerdiń duwasına qulaq saladı,
Páriyadınan bas tartpaydı.

19Ele tuwılmaǵan xalıq Jaratqan Iyege alǵıs-maqtaw aytsın,
Mınalar keyingi áwlad ushın jazılsın:
20– 21Tutqınlardıń nalasın tıńlaw ushın,
Ólimge húkim etilgenlerdi qutqarıw ushın,
Jaratqan Iye joqarıdaǵı muxaddes mákanınan qaradı,
Kóklerden jer júzine názer tasladı.
22Solay etip, Jaratqan Iyeniń atı Sionda,
Alǵıs-maqtaw Erusalimde járiyalanadı.
23Xalıqlar hám patshalıqlar,
Jaratqan Iyege sıyınıw ushın jıynaladı.

24Ómir jolımda Ol meni kúshten qaldırdı,
Ómir jasımdı qısqarttı.
25Men bılay dedim:
«Qudayım, ómirimniń jartısında janımdı alma!
Seniń jıllarıń dawam eter áwladtan-áwladqa!
26Ázelden jer júzin ornattıń,
Kókler Seniń qollarıńnıń dóretpesi.
27Olar joq boladı, al Sen dawam eteseń,
Olardıń hámmesi kiyimdey tozıp qaladı,
Shapanday etip olardı almastırasań,
Olar joq bolıp ketedi.
28Biraq Sen ózgermeyseń,
Hesh tawısılmaydı Seniń jıllarıń.
29Qullarıńnıń balaları usı jerdi mákanlaydı,
Áwladları Seniń aldıńda qáwipsiz jasaydı».