‏ Psalms 102

1Dawıttıń jırı
Jaratqan Iyege alǵıslar ayt, háy janım!
Onıń muxaddes atına alǵıslar ayt, háy pútkil barlıǵım!
2Jaratqan Iyege alǵıslar ayt, háy janım!
Umıtpa Onıń barlıq jaqsılıqların!
3Barlıq ayıplarımdı keshiretuǵın,
Hámme keselime shıpa beretuǵın,
4Janımdı ólim shuqırınan azat etetuǵın,
Súyispenshilik hám rehim tajın kiydiretuǵın,
5Ómirimdi iygilik penen toltıratuǵın Ol,
Meni búrkittey etip, jaslıǵımdı tikleydi.

6Jaratqan Iye barlıq ezilgenlerge,
Haqlıq hám ádalatlıq qıladı.
7Óz jolların Muwsaǵa,
Islerin izraillılarǵa kórsetti.
8Jaratqan Iye rehimli hám miyrimli,
Sabır-taqatlı hám súyispenshiligi ullı.
9Ol bárqulla ayıplay bermeydi,
Máńgige kek te saqlamaydı.
10Bizlerge gúnalarımızǵa qarap qatnas qılmaydı,
Jamanlıqlarımızdı ózimizge qaytarmaydı.
11Kókler jer júzinen qanshelli joqarı bolsa,
Onıń Ózinen qorqatuǵınlarǵa bolǵan súyispenshiligi de sonshelli ullı.
12Shıǵıs batıstan qanshelli uzaq bolsa,
Ol jınayatlarımızdı bizlerden sonshelli uzaqlastırdı.
13Áke balalarına qanday rehim qılsa,
Jaratqan Iye de Ózinen qorqatuǵınlarǵa sonday rehim qıladı.
14Ol bizlerdiń qanday jaralǵanımızdı biledi,
Topıraqtan ekenimizdi umıtpaydı.

15Adamzattıń ómiri shópke uqsaydı,
Daladaǵı gúldey bolıp gúlleydi.
16Samal eskende, joq bolıp ketedi,
Bolǵan jeri onı qaytıp tanımaydı.
17– 18Biraq Jaratqan Iye Ózinen qorqatuǵınlardı máńgi súyedi,
Onıń kelisimine ámel qılǵanlardıń,
Hám pármanlarına muqıyatlı túrde boysınǵanlardıń,
Balalarınıń balalarına sadıqlıǵı dawam etedi.

19Jaratqan Iye Óz taxtın kóklerge ornattı,
Onıń patshalıǵı hámme jerdi óz ishine aladı.
20Onıń sózine qulaq salıp,
Aytqanların orınlaytuǵın,
Qúdireti kúshli perishteler,
Jaratqan Iyege alǵıslar aytıń!
21Jaratqan Iyeniń kóktegi láshkerleri,
Onıń erkin orınlaytuǵın xızmetkerleri,
Oǵan alǵıs-maqtawlar aytıń!
22Jaratqan Iyege alǵıslar aytıń,
Háy, Onıń patshalıǵındaǵı barlıq jaratılıs!
Jaratqan Iyege alǵıslar ayt, háy janım!