Psa 103 | KaaIBT22L | STEP | Jaratqan Iyege alǵıslar ayt, háy janım! Qudayım Jaratqan Iye, Sen oǵada ullısań! Saltanat hám ullılıqqa bólengenseń,

‏ Psalms 103

1 Jaratqan Iyege alǵıslar ayt, háy janım!
Qudayım Jaratqan Iye, Sen oǵada ullısań!
Saltanat hám ullılıqqa bólengenseń,
2 Shapanday etip nurǵa oranǵansań,
Kóklerdi shatırday etip jayǵansań,
3 Sarayıńdı joqarıdaǵı suwlardıń ústine qurǵansań,
Bultlardı Ózińe sawash arbası qılǵansań,
Samaldıń qanatlarına minip keteseń.
4 Samallardı Ózińe xabarshı,
Ot jalınların xızmetker qılasań.

5 Sen jerdi tiykar ústine ornattıń,
Ol máńgi-baqıy ornınan qozǵalmas.
6 Oǵan tuńǵıyıqtı kiyim sıyaqlı kiygizdiń,
Hátteki, tawlardıń joqarısın da suw qaplaǵan.
7 Seniń keyislerińnen suwlar qashtı,
Gúrkiregen dawısıńnan olar shegindi.
8 Tawlardan asıp, oypatlıqlarǵa tústi,
Óziń belgilegen jerlerge aqtı.
9 Suwlar tasıp ketpesin, jer júzin jáne qaplamasın dep,
Olar ushın shegara qoydıń.

10 Bulaqlardı saylarǵa qaray,
Tawlar arası menen aǵızasań.
11 Olar barlıq jabayı haywanlardı suwǵaradı,
Qulanlardıń shólin qandıradı.
12 Quslar suw boylarında jasaydı,
Putalar arasınan olar sayraydı.
13 Kóktegi úyińnen tawlardı suwǵarasań,
Jer júzi islerińniń miywesinen toyadı.

14 Mallardı shópler menen támiyinleyseń,
Adamlar miynet penen azıǵın alsın dep,
Jerge eginler ósireseń.
15 Kewillerin kóteretuǵın sharaptı,
Júzlerine nur beretuǵın záytún mayın,
Kúsh-quwat beretuǵın nandı Sen bereseń.

16 Jaratqan Iyeniń terekleri,
Ózi tikken Lebanondaǵı kedr aǵashları suwǵa qanadı.
17 Quslar tereklerde uya quradı,
Láylektiń uyası bar sárwi aǵashlarında.
18 Taw eshkileri biyik tawlarda jasaydı,
Jartaslarda damanlardıń ^{▼▼ Daman – surokqa uqsaytuǵın haywan.} inleri bar.

19 Waqıttı belgilesin dep, aydı,
Batatuǵın waqtın biletuǵın quyashtı jarattıń.
20 Qarańǵılıq shóktirgenińde, tún boladı,
Sonda toǵay haywanları gezip júredi.
21 Arıslanlar aqırıp, olja izleydi,
Qudaydan azıǵın soraydı.
22 Quyash shıqqanda, olar izine qaytadı,
Ózleriniń inlerine barıp jatadı.
23 Adam óz jumıslarına shıǵadı,
Keshke deyin jumısı menen bánt boladı.

24 Qanshelli isler qıldıń, Jaratqan Iye!
Hámmesin danalıq penen jarattıń,
Jer júzi jaratqanlarıń menen tolı.
25 Mine, ushı-qıyırı joq teńizler,
Ishinde qaynaǵan sansız janzatlar,
Úlken-kishi janıwarlar.
26 Ol jerde kemeler júzedi,
Ishinde oynasın dep, jarattıń Liwyatandı ^{▼▼ Liwyatan – teńizde jasaytuǵın úlken maqluq.}.

27 Waqtında ırısqımızdı bersin, dep,
Olardıń hámmesi Saǵan kóz tigedi.
28 Írısqısın bergenińde, olar jıynap aladı,
Qollarıńdı ashqanıńda, olar jep toyadı.
29 Júzińdi jasırǵanıńda, olar sasqalaqlap qaladı,
Janların alsań, olar ólip, topıraqqa qaytadı.
30 Jan berseń, olar jaratıladı,
Jańadan ómir bereseń jer júzine.

31 Jaratqan Iyeniń saltanatı máńgi dawam etsin!
Jaratqan Iye shadlansın Óz jaratqanlarına!
32 Ol jer betine kóz taslasa, jer titireydi,
Tawlarǵa qol tiygizse, tawlar túteydi.

33 Ómirim boyı Jaratqan Iyeni jırlayman,
Bar ekenmen, saz shertip, Qudayıma alǵıslar aytaman.
34 Oy-pikirlerim Oǵan maqul bolsın,
Jaratqan Iyede quwanaman!
35 Jer júzinen gúnakarlar joq bolsın,
Bunnan bılay jawızlar bolmasın!
Jaratqan Iyege alǵıslar ayt, háy janım!

Haliluya! ^{▼▼ Haliluya – «Jaratqan Iyeni alǵıslań» degen mániste.}