Psa 105 | KaaIBT22L | STEP | Haliluya! Jaratqan Iyeni táriyipleń, Ol iygilikli, Sadıqlıǵı máńgi dawam etedi.

‏ Psalms 105

1 Haliluya!

Jaratqan Iyeni táriyipleń, Ol iygilikli,
Sadıqlıǵı máńgi dawam etedi.
2 Jaratqan Iyeniń ullı islerin kim aytıp bere aladı?
Kim Oǵan ılayıqlı túrde alǵıs ayta aladı?
3 Qanday baxıtlı ádalatlıq penen is tutqanlar,
Hámme waqıtta tuwrı islerdi qılǵanlar!

4 Jaratqan Iye, xalqıńa rehim etkenińde, esle meni,
Qutqarǵanıńda, meni de itibarǵa al.
5 Tańlaǵanlarıńnıń baxıtın kóreyin,
Xalqıńnıń quwanıshın kórip, quwanayın,
Xalqıńnıń maqtanıshın birge bóliseyin.

6 Ata-babalarımız sıyaqlı, bizler de gúna isledik,
Ayıp isler hám jawızlıq qıldıq.
7 Ata-babalarımız Mısırda bolǵan waqıtta,
Islegen ájayıp islerińe itibar bermedi,
Seniń mol súyispenshiligińdi eslemedi,
Teńiz boyında, Qızıl teńizde qozǵalań kóterdi.
8 Biraq Jaratqan Iye qúdiretin kórsetiw ushın,
Óz atı ushın olardı qutqardı.
9 Qızıl teńizge baqırdı, teńiz qurıp qaldı,
Qurǵaq jerden júrgizgendey,
Olardı teńiz túbi arqalı ótkerdi.
10 Olardı jek kóretuǵınlardıń qolınan qutqardı,
Dushpanlarınıń qolınan azat qıldı.
11 Jawların suw bastı,
Olardıń hesh biri aman qalmadı.
12 Sonda ata-babalarımız Onıń sózine isendi,
Onı alǵıslap, qosıq ayttı. ^{▼▼ Shıǵ 14:10-31.}

13 Degen menen, olar Jaratqan Iyeniń islerin dárhal umıttı,
Onıń kórsetetuǵın jol-jorıǵın kútip otırmadı.
14 Shólde olar nápsixorlıqqa berildi,
Izsiz dalada Qudaydı sınadı.
15 Quday olardıń soraǵanın berdi,
Biraq olarǵa awır kesellik jiberdi ^{▼▼ San 11.}.

16 Ordada olar Muwsanı,
Jaratqan Iyeniń muxaddesi bolǵan Xarondı kúnledi,
17 Jer jarılıp, Datandı jutıp jiberdi,
Abiram menen onıń sheriklerin jalmadı.
18 Olardıń izinen júrgenlerge ot tústi,
Jalın jandırıp jiberdi jawızlardı. ^{▼▼ San 16.}

19 Xoreb tawında tananıń músinin islep aldı,
Sol quyıp islegen butına tabındı.
20 Shóp jeytuǵın tananıń músinine,
Qudaydıń ullılıǵın almastırdı.
21 Olar umıttı ózlerin qutqarǵan Qudaydı,
Mısırda ullı islerdi islegendi,
22 Xam úlkesinde ájayıp islerdi kórsetkendi,
Qızıl teńizde tań qalarlıq islerdi qılǵandı.
23 Sonıń ushın, Quday olardı joq qılatuǵının ayttı,
Biraq tańlaǵan adamı Muwsa araǵa túsip,
Onı qurtaman degen ǵázebinen qaytardı. ^{▼▼ Shıǵ 32.}

24 Keyin ájayıp elden júz burdı,
Qudaydıń bergen wádesine isenbedi.
25 Óz shatırlarında tońqıldadı,
Jaratqan Iyeniń aytqanlarına qulaq salmadı.
26 Sonıń ushın, Jaratqan Iye ant iship:
«Sizlerdi shólde qurtıp taslayman,
27 Urpaqlarıńızdı milletler arasına tarqataman,
Ózge ellerge shashıp jiberemen», – dedi. ^{▼▼ San 13–14.}

28 Olar Peordaǵı Baalǵa baylanıp qaldı,
Ólilerge berilgen qurbanlıq góshinen jedi.
29 Olar óz qılmısları menen Jaratqan Iyeni ǵázeplendirdi,
Sonlıqtan oba keselligi olardıń arasına jayıldı.
30 Pinexas turıp, araǵa tústi,
Sonda apat ta toqtadı.
31 Onıń bul isi ádillik sanalıp,
Áwladtan-áwladqa máńgi dawam etedi. ^{▼▼ San 25.}

32 Meriba suwları janında olar Jaratqan Iyeni jáne ǵázeplendirdi,
Olar sebepli Muwsanıń basına qayǵı tústi.
33 Olar Muwsanıń ashıwına tiydi,
Ol da oylanbastan sóyledi. ^{▼▼ Shıǵ 17:1-7; San 20:2-13.}

34 Jaratqan Iye joq etiwdi buyırsa da,
Olar joq etpedi xalıqlardı.
35 Basqa xalıqlar menen aralastı,
Olardıń úrp-ádetlerin úyrendi.
36 Olardıń butlarına tabındı,
Butlar olar ushın duzaq boldı.
37 Ul hám qızların,
Jinlerge qurbanlıq qıldı.
38 Qanan butlarına qurbanlıq bolsın dep,
Ul hám qızlarınıń qanın,
Ayıpsızlardıń qanın tókti.
El tógilgen qan sebepli haramlandı.
39 Olar isleri menen haram boldı,
Qılmısları menen opasızlıq qıldı. ^{▼▼ Nzm 7:1-6; 18:9-13; Biy 1:19–2:5.}

40 Jaratqan Iyeniń ǵázebi lawladı xalqına qarsı,
Jerkendi Óziniń menshik xalqınan.
41 Olardı basqa xalıqlarǵa táslim qıldı,
Jek kóretuǵınları olarǵa húkimdar boldı.
42 Dushpanları olardı ezdi,
Olardıń qol astında basları iyildi.
43 Jaratqan Iye olardı kóp márte qutqardı,
Biraq olardıń aqıl-esi qozǵalań kóteriw boldı,
Gúnaları sebepli páske urıldı. ^{▼▼ Biy 2:10-19.}
44 Sonda da, Jaratqan Iye xalıqtıń qıyınshılıǵına itibar berdi,
Dad-páriyadına qulaq saldı.
45 Olar haqı Óz kelisimin esledi,
Ullı súyispenshiligi sebepli olarǵa rehim qıldı.
46 Olardı tutqınǵa alǵanlardı,
Rehimli bolıwǵa iytermeledi.

47 Qutqar bizlerdi, Qudayımız Jaratqan Iye,
Basqa xalıqlar arasınan bizlerdi jıyna.
Muxaddes atıńdı táriyipleyik,
Saǵan alǵıs ayta alǵanımız ushın maqtanayıq.

48 Izraildıń Qudayı Jaratqan Iyege,
Áwel bastan, máńgige deyin alǵıslar bolsın!
Pútkil xalıq: «Awmiyin!» – desin.

Haliluya!