‏ Psalms 106

1Jaratqan Iyeni táriyipleń, Ol iygilikli,
Sadıqlıǵı máńgi dawam etedi.
2Solay desin Jaratqan Iyeniń qutqarǵanları,
Dushpan qolınan azat etip alǵanları,
3Shıǵıs, batıs, arqa hám qubladan,
Shet ellerden jıynap alǵanları.

4Bazıları izsiz dalalarda gezip júrdi,
Mákanlaw ushın qalaǵa jol tappadı.
5Ash bolıp, shóllep qaldı,
Janları hálsirep, óle jazladı.
6Sonda olar azap ishinde Jaratqan Iyege jalbarındı,
Jaratqan Iye olardı azaptan azat etti.
7Mákanlay alatuǵın qalaǵa olardı,
Tuwrı jol menen jetelep, baslap bardı.
8Alǵıslar aytsın Jaratqan Iyege súyispenshiligi ushın,
Adamlarǵa islegen ájayıp isleri ushın.
9Ol shóllegenniń shólin qandırdı,
Ash bolǵandı jaqsı azıqlar menen toydırdı.

10Bazıları tas túnek qarańǵılıqta,
Shınjırlanıp, azap ishinde otırdı.
11Olar Qudaydıń sózlerine qarsı shıǵıp,
Quday Taalanıń úgit-násiyatların mensinbegen edi.
12Ol awır jumıslar menen olardıń kókiregin bastı,
Jıǵılǵanda, járdem beretuǵın hesh kim bolmadı.
13Sonda olar azap ishinde Jaratqan Iyege jalbarındı,
Jaratqan Iye olardı azaptan qutqardı.
14Alıp shıqtı tas túnek qarańǵılıqtan,
Úzip tasladı shınjırların.
15Alǵıslar aytsın Jaratqan Iyege súyispenshiligi ushın,
Adamlarǵa islegen ájayıp isleri ushın!
16Ol qola dárwazalardı sındırdı,
Temir támbilerdi ekige bólip tasladı.

17Bazıları jınayat qılıp, aqmaqtay boldı,
Gúnaları sebepli azap shekti.
18Barlıq azıq-awqattan júrekleri aynıp,
Ólim awzına jaqınlap qaldı.
19Sonda olar azap ishinde Jaratqan Iyege jalbarındı,
Jaratqan Iye olardı azaptan qutqardı.
20Sózin jiberip, shıpaladı,
Qábirden olardı qutqardı.
21Alǵıslar aytsın Jaratqan Iyege súyispenshiligi ushın,
Adamlarǵa islegen ájayıp isleri ushın!
22Minnetdarshılıq qurbanlıqların usınsın,
Onıń islerin bálent dawıs penen járiyalasın!

23Bazıları kemeler menen teńizge shıǵıp,
Sheksiz suwlarda sawda qıldı,
24Jaratqan Iyeniń islerin,
Tereń suwlarda islegen ájayıp islerin kórdi.
25Ol buyrıq bergende, dawıl baslandı,
Teńiz tolqınları biyik kóterildi.
26Kemeler joqarı kóterilip, jáne tuńǵıyıqqa tústi,
Apattan kemedegilerdiń ruwxları túsip ketti.
27Olar máskúnemdey shayqalıp júrdi,
Olardıń sheberlikleri nátiyje bermedi.
28Sonda olar azap ishinde Jaratqan Iyege jalbarındı,
Jaratqan Iye olardı apattan alıp shıqtı.
29Ol dawıldı tınıshlandırdı,
Teńiz tolqınları da basıldı.
30Dawıl toqtaǵanda, olar quwandı,
Ózleri gózlegen mánzilge Jaratqan Iye jetkerdi.
31Alǵıslar aytsın Jaratqan Iyege súyispenshiligi ushın,
Adamlarǵa islegen ájayıp isleri ushın!
32Onı ullılasın jámiyet ishinde,
Alǵıslar aytsın aqsaqallar jıyınında.

33Ol dáryalardı shólge,
Bulaqlardı kewip qalǵan jerge aylandıradı.
34Turǵınlarınıń jawızlıǵı sebepli,
Ónimli topıraqtı shor jerge aylandıradı.
35Al shóldi kóllerge,
Kewip qalǵan jerdi bulaqlarǵa aylandıradı.
36Ashlardı sol jerge jaylastıradı,
Olar jasaw ushın qala quradı.
37Egin egip, júzimzarlar otırǵızadı,
Solardan mol ónim aladı.
38Jaratqan Iyeniń jarılqawı astında,
Olar ósip-ónedi,
Mallarınıń sanı kóbeyedi.

39– 40Jaratqan Iye xor qıldı aqsúyeklerdi,
Izsiz bir shólde gezdirdi olardı.
Kúshli eziwshilikten hám azaptan,
Olardıń sanı azayıp, kókirekleri basıldı.
41Al jarlılardı bolsa, eziwshilikten qutqardı,
Qoy súriwindey etip, zúryadın kóbeytti.
42Haq adamlar bunı kórip shadlanadı,
Nahaqlar bolsa awızların jabadı.

43Kim dana bolsa, usılarǵa itibar bersin,
Jaratqan Iyeniń súyispenshiligin ańlasın.