Psalms 111
1Haliluya!Qanday baxıtlı Jaratqan Iyeden qorqatuǵın,
Onıń buyrıqların orınlap, ráhátlenetuǵın adam!
2Onıń áwladı qúdiretli bolar jer júzinde,
Haqlardıń áwladı jarılqaw aladı.
3Molshılıq hám baylıq úyinde boladı,
Haqlıǵı máńgi dawam etedi.
4Qarańǵılıqta nur shıǵadı haqlar ushın,
Miyrim-shápáátli, rehimli hám ádil adamlar ushın.
5Qolı ashıq, qarız beretuǵın,
Islerin ádalatlıq penen isleytuǵın adam abadan turmısqa erisedi!
6Ol hasla súrnikpeydi,
Haq adam máńgi eske alınadı.
7Ol jaman xabardan qorqpaydı,
Jaratqan Iyege isengen júregi bekkem.
8Onıń júregi mıqlı, qorqıw degendi bilmeydi,
Dushpanlarınıń jeńilisin kóredi.
9Ol mútájlerge saqıylıq penen járdem beredi,
Onıń haqlıǵı máńgi dawam etedi,
Qúdiretli hám abıraylı boladı.
10Jawız adam bunı kórip, ashıwlanadı,
Tislenip, ózin ózi jep, joq boladı,
Jawızlardıń qálewi pushqa shıǵadı.
Copyright information for
KaaIBT22L