‏ Psalms 117

1Jaratqan Iyeni táriyipleń, Ol iygilikli,
Sadıqlıǵı máńgi dawam etedi!
2Izrail xalqı bılay desin:
«Sadıqlıǵı máńgi dawam etedi!»
3Xaronnıń urpaǵı bılay desin:
«Sadıqlıǵı máńgi dawam etedi!»
4Jaratqan Iyeden qorqatuǵınlar bılay desin:
«Sadıqlıǵı máńgi dawam etedi!»

5Qıyın jaǵdayımda Jaratqan Iyege jalbarındım,
Juwap berip, Ol meni keńislikke shıǵardı.
6Jaratqan Iye meniń menen birge, qorqpayman,
Ne qıla aladı adamlar maǵan?
7Jaratqan Iye meniń menen birge, Ol meniń mádetkerim,
Meni jek kórgenlerdiń jeńilisin kóremen.
8Adamnan úmit etkennen góre,
Jaratqan Iyeden pana izlegen jaqsı.
9Aqsúyeklerden úmit etkennen góre,
Jaratqan Iyeden pana izlegen jaqsı.

10Barlıq milletler meni qorshap aldı,
Jaratqan Iyeniń atı menen qıyrattım olardı.
11Qorshap alıp, maǵan hújim qıldı,
Jaratqan Iyeniń atı menen qırdım olardı.
12Hárrelerdey meni qorshap aldı,
Biraq janǵan tiken putasınday tez óship qaldı,
Jaratqan Iyeniń atı menen qırdım olardı.
13Meni qulatıw ushın qattı iyterdi,
Biraq Jaratqan Iye maǵan járdem berdi.
14Jaratqan Iye kúsh-qúdiretim,
Qutqarıwǵa keldi Ol meni.

15Shadlıq hám jeńis dawısları,
Jańlaydı haq adamlardıń shatırlarında:
«Jaratqan Iyeniń oń qolı qúdiretli isler qıladı!
16Jaratqan Iyeniń oń qolı jeńis beredi,
Jaratqan Iyeniń oń qolı qúdiretli isler qıladı!»
17Men ólmeymen, jasayman,
Jaratqan Iyeniń islerin járiyalayman.
18Jaratqan Iye meni qatań jazalap, jolǵa saldı,
Biraq ólimge tapsırmadı.

19Ashıń maǵan haqlıq dárwazaların,
Kirip, Jaratqan Iyeni táriyipleyin.

20Bul Jaratqan Iyeniń dárwazası!
Haq adamlar onnan kire aladı.

21Seni táriyipleymen, sebebi maǵan juwap berdiń,
Meni qutqarıwǵa keldiń.
22Qurılısshılardıń kereksiz dep taslaǵan tası,
Úydiń múyeshiniń tiykarǵı tası boldı.
23Jaratqan Iye qılǵan bul is,
Kózimizge ájayıp kórindi!
24Búgin Jaratqan Iyeniń jaratqan kúni,
Usı kúni quwanıp, shadlanayıq!
25Jalbarınamız, Jaratqan Iye, qutqar bizlerdi,
Jalbarınamız, Jaratqan Iye, bizlerge áwmet ber!

26Jaratqan Iyeniń atı menen keletuǵın jarılqansın!
Jaratqan Iyeniń Úyinen saǵan pátiya beremiz.
27Jaratqan Iye – Qudaydur, bizlerge nur beredi,
Bayramdı belgilep baslań,
Japıraqlı shaqalardı alıp, qurbanlıq orınǵa barıń.

28Sen meniń Qudayımsań, Seni táriyipleymen,
Sen meniń Qudayımsań, Seni ullılayman.

29Jaratqan Iyeni táriyipleń, Ol iygilikli,
Sadıqlıǵı máńgi dawam etedi.