‏ Psalms 118

1Qanday baxıtlı minsiz joldan júrgenler,
Jaratqan Iye, Seniń nızamıń boyınsha jasaytuǵınlar!
2Qanday baxıtlı Seniń shártlerińe ámel qılatuǵınlar,
Shın júregi menen Seni izlegenler!
3Olar hesh qanday nahaqlıq qılmas,
Seniń jolıńda júrer.
4Bergen pármanlarıńdı,
Muqıyatlı túrde orınlawımızdı tapsırdıń.
5Qáne endi, turaqlı bolsam,
Seniń qaǵıydalarıńdı orınlawda!
6Eger barlıq buyrıqlarıńnan názerimdi ayırmasam,
Men shermende bolmayman.
7Seniń ádil nızamlarıńdı úyrengenimde,
Pák júrek penen Saǵan alǵıs-maqtaw aytaman.
8Qaǵıydalarıńdı orınlayman,
Meni pútkilley taslap ketpe!

9Jas jigit qalay pák jol menen júre aladı?
Seniń sóziń boyınsha jasaw arqalı soǵan erisedi.
10Pútkil júregim menen Saǵan umtılaman,
Buyrıqlarıńnan awıp ketiwime jol qoyma!
11Saǵan qarsı gúna islemewim ushın,
Júregimde saqladım sózlerińdi.
12Alǵıslar bolsın Saǵan, Jaratqan Iye,
Maǵan qaǵıydalarıńdı úyret.
13Awzıńnan shıqqan barlıq qararlarıńdı,
Óz awzım menen járiyalayman.
14Shártleriń menen jasap, shadlanaman,
Úlken baylıq tapqanday bolaman.
15Pármanlarıń haqqında tereń oy juwırtaman,
Seniń jollarıńa dıqqat qılaman.
16Qaǵıydalarıńnan lázzet alaman,
Sózlerińdi umıtpayman.

17Maǵan, qulıńa iygilik qıl,
Ómir súrip, sózińe ámel qılaman.
18Kózlerimdi ash,
Nızamıńdaǵı ájayıp islerińdi kóreyin.
19Men bir kelgindimen bul dúnyada,
Buyrıqlarıńdı mennen jasırma.
20Bárqulla Seniń húkimlerińdi,
Janım saǵınıp sarǵayadı.
21Buyrıqlarıńnan awıp ketken,
Náletlengen tákabbirlerdi keyiyseń.
22Masqarashılıq hám xorlıqtı mennen uzaqlastır,
Sebebi shártlerińdi orınlap kiyatırman.
23Basshılar jıynalıp, maǵan qarsı ósek aytsa da,
Men, qulıń Seniń qaǵıydalarıń haqqında tereń oy juwırtaman.
24Shártlerińnen lázzet alaman,
Olar maǵan aqıl beredi.

25Janım ájelge jaqınlap qaldı,
Wádeń boyınsha ómir ber maǵan.
26Júrgen jollarımdı aytıp berdim, maǵan juwap berdiń,
Qaǵıydalarıńdı úyret maǵan!
27Pármanlarıńnıń mánisin túsindir,
Solay etip, ájayıp isleriń haqqında oy juwırtayın.
28Ǵam-qayǵıdan janım ada boldı,
Wáde qılǵanıńday, meni ayaqqa turǵız!
29Jaman joldan uzaqlastır,
Miyrimiń menen maǵan nızamıńdı úyret.
30Sadıqlıq jolın tańladım,
Ádalatlı qaǵıydalarıńdı kóz aldıma qoydım.
31Shártlerińdi bekkem uslayman,
Jaratqan Iye, uyatqa qaldırma meni!
32Shın júrekten buyrıqlarıńnıń jolınan júremen,
Kewlime keń túsinik berdiń.

33Qaǵıydalarıńnıń jolın úyret maǵan, Jaratqan Iye,
Men olardı aqırına deyin orınlayman.
34Túsinik ber, nızamıńa ámel qılaman,
Shın júregimnen oǵan boysınaman.
35Buyrıqlarıńnıń jolı menen meni jetele,
Men onnan ráhát alaman.
36Júregimdi nahaq paydaǵa emes,
Al Óz shártlerińe qaray bur.
37Kózlerimdi biyhuda nárselerden qaytar,
Óz jolıńda janımdı saqlay gór.
38Adamlar Sennen qorqıwı ushın,
Maǵan, Óz qulıńa bergen wádeńdi orınla.
39Meni ózim qorqqan shermendelikten uzaq qıl,
Seniń qaǵıydalarıń iygilikli.
40Pármanlarıńa talpınaman,
Sen ádalatlısań, ómirimdi saqla.

41Maǵan súyispenshiligińdi kórset, Jaratqan Iye,
Wádeń boyınsha qutqar meni!
42Sonda meni mazaqlaǵanlarǵa juwap qaytara alaman,
Seniń sózińe isenemen.
43Haqıyqat sózińdi alıp qoyma awzımnan,
Seniń qararlarıńa úmit baylayman.
44Nızamıńa hámme waqıtta,
Házir hám máńgi-baqıy ámel qılaman.
45Men erkin júremen,
Sebebi pármanlarıńdı orınlawǵa tırısaman.
46Patshalar aldında shártlerińdi aytaman,
Bunnan uyalmayman.
47Buyrıqlarıńnan lázzet alaman,
Olardı jaqsı kóremen.
48Buyrıqlarıńdı súyip, húrmet etemen,
Qaǵıydalarıń haqqında oy juwırtaman.

49Qulıń bolǵan maǵan bergen wádeńdi esle,
Ol arqalı Sen maǵan úmit berdiń.
50Seniń wádeń ómirimdi saqlaydı,
Azap ishinde qalǵanımda usı maǵan jubanısh beredi.
51Tákabbirler meni hádden tıs mazaqlaydı,
Sonda da Seniń nızamıńnan júz burmadım.
52Ázelgi qaǵıydalarıńdı esleymen,
Solar maǵan jubanısh beredi, Jaratqan Iye.
53Nızamıńnan júz burǵan jawızlar sebepli,
Ǵázepke tolıp ketemen.
54Qay jerde jasasam da,
Seniń qaǵıydalarıńdı jırlap júremen.
55Túnde atıńdı esleymen, Jaratqan Iye,
Nızamıńa ámel qılaman.
56Bul maǵan ádet bolıp qalǵan,
Seniń pármanlarıńa ámel qılaman.

57Meniń úlesim Senseń, Jaratqan Iye,
Sózlerińdi orınlayman, dep wáde berdim.
58Shın júregimnen Seniń miyrimińdi izleymen,
Wádeń boyınsha maǵan rehim et.
59Tutqan jollarıma dıqqat ettim,
Shártleriń boyınsha adım attım.
60Buyrıqlarıńdı orınlawǵa,
Asıǵaman hám keshiktirmeymen.
61Jawızlardıń arqanları meni orap bayladı,
Al men nızamıńdı umıtpadım.
62Ádil húkimleriń ushın,
Tún ortasında turıp, Seni táriyipleymen.
63Sennen qorqatuǵınlardıń,
Pármanlarıńa ámel qılatuǵınlardıń dostıman.
64Jer júzi súyispenshiligińe tolı, Jaratqan Iye,
Qaǵıydalarıńdı úyret maǵan!

65Jaratqan Iye, jaqsılıq qıldıń qulıńa,
Bergen wádeńde turdıń.
66Maǵan zeyin hám túsinik ber,
Seniń buyrıqlarıńa isenemen.
67Azap shegiwden aldın joldan adastım,
Biraq endi Seniń sózińe ámel qılaman.
68Sen iygilikliseń, jaqsılıq qılasań,
Maǵan qaǵıydalarıńdı úyret.
69Tákabbirler jalǵan sóylep, meni qaraladı,
Biraq men shın júregim menen pármanlarıńa boysınaman.
70Olardıń júreklerin may basqan,
Al men nızamıńnan lázzet alaman.
71Jaqsı boldı azap shekkenim,
Usı arqalı qaǵıydalarıńdı úyrendim.
72Awzıńnan shıqqan nızam men ushın,
Mıńlaǵan altın hám gúmisten bahalıdur.

73Seniń qollarıń meni jaratıp, pishim berdi,
Túsinik berip, buyrıqlarıńdı úyret.
74Sennen qorqatuǵınlar meni kórip quwansın,
Men Seniń sózińe úmit bayladım.
75Jaratqan Iye, Seniń húkimleriń ádil ekenin bilemen,
Maǵan ádalatlı túrde azap shektirdiń.
76Qulıń bolǵan maǵan bergen wádeń boyınsha,
Súyispenshiligiń meni jubatsın.
77Maǵan rehim qıl, aman jasayın,
Nızamıń men ushın lázzetli.
78Meni jalǵan ayıplaǵanı ushın,
Tákabbirler shermende bolsın.
Al men pármanlarıń haqqında oy juwırtaman.
79Shártlerińdi biletuǵınlar, Sennen qorqatuǵınlar,
Maǵan bet bursın.
80Shermende bolmawım ushın,
Qaǵıydalarıńa bola júregim minsiz bolsın.

81Qutqarıwıńa intizar bolıp, janım ada boldı,
Seniń sózińe úmit bayladım.
82Bergen sózińniń orınlanıwın kútip,
Kózlerimniń nurı sóndi,
«Qashan meni jubatasań?» – dep sorayman.
83Tozǵan shapanday bolıp qalsam da,
Umıtpayman Seniń qaǵıydalarıńdı.
84Qulıń bolǵan men jáne qansha kútiwim kerek?
Meni quwǵın qılıp atırǵanlardı qashan húkim qılasań?
85Nızamıńa boysınbaytuǵın tákabbirler,
Shuqır qazdı men ushın.
86Barlıq buyrıqlarıń isenimli,
Meni nahaq quwdalamaqta, járdem ber!
87Olar meni jer júzinen joq qıla jazladı,
Biraq men Seniń pármanlarıńnan ayırılmadım.
88Súyispenshiligiń haqı janımdı qorǵa,
Awzıńnan shıqqan shártlerińe ámel qılaman.

89Jaratqan Iye, sóziń máńgi,
Ol kóklerde bekkem turadı.
90Sadıqlıǵıń áwladtan-áwladqa dawam etedi,
Sen ornatqan jer júzi bekkem turadı.
91Qararlarıń boyınsha olar búginge deyin turıptı,
Olardıń hámmesi Saǵan xızmet etedi.
92Eger nızamıń maǵan lázzet baǵıshlamaǵanda,
Shekken azaplarımnan ólip keter edim.
93Pármanlarıńdı hasla umıtpayman,
Solar arqalı ómirimdi saqladıń.
94Men Saǵan tiyislimen, qutqar meni,
Seniń pármanlarıńa talpınaman.
95Jawızlar meni joq qılıw ushın ańlıydı,
Al men Seniń shártlerińe dıqqat awdaraman.
96Seniń buyrıqlarıńnan basqa,
Hesh bir nárse minsiz emes.

97Nızamıńdı qanshelli súyemen!
Kúni boyı onıń ústinde oy juwırtaman.
98Buyrıqlarıń meni dushpanlarımnan góre dana qıladı,
Buyrıqlarıń máńgi meniń menen birge.
99Barlıq ustazlarımnan góre, aqıllıraq boldım,
Sebebi shártleriń ústinde oy juwırttım.
100Jası úlkenlerden góre, danaman,
Óytkeni pármanlarıńa boysındım.
101Seniń sózińe ámel qılıw ushın,
Jaman jolǵa ayaq basıwdan awlaq boldım.
102Qaǵıydalarıńnan shetke shıqpadım,
Sen maǵan tálim bergenseń.
103Sózleriń tańlayıma sonshelli mazalı,
Paldan da tatlı meniń awzıma!
104Pármanlarıń arqalı danalıqqa iye bolaman,
Sonıń ushın, hár qanday jalǵan joldan jerkenemen.

105Sózleriń qádemlerim ushın shıra,
Jolımdı jarıq qılatuǵın nur.
106Ádil qaǵıydalarıńdı orınlawǵa ant ishtim,
Sózimde turıp, antımdı orınlayman.
107Kóp azap shektim, Jaratqan Iye,
Wádeń boyınsha janımdı qorǵa.
108Íqtıyarlı sadaqam bolǵan alǵıslarımdı qabıl et,
Maǵan qaǵıydalarıńdı úyret.
109Janım hámme waqıtta qáwip astında,
Sonda da nızamıńdı umıtpayman.
110Jawızlar duzaq qurdı maǵan,
Sonda da pármanlarıńnan shetke shıqpadım.
111Shártleriń máńgi miyrasım,
Júregimniń quwanıshı olar.
112Qaǵıydalarıńa aqırına deyin,
Máńgige boysınıwdı qarar ettim.

113Eki júzlilerden jerkenemen,
Seniń nızamıńdı súyemen.
114Panam hám qalqanım Senseń,
Seniń sózińe úmit bayladım.
115Háy, jawızlar, mennen awlaq júriń,
Men Qudayımnıń buyrıqların orınlayman.
116Quday, jasawım ushın, wádeń boyınsha meni qollap quwatla,
Úmitimdi bosqa shıǵarıp, uyaltpa!
117Qutqarılıwım ushın, meni qollap quwatla,
Mudamı dıqqat salaman qaǵıydalarıńa.
118Qaǵıydalarıńnan awıp ketkenlerden júz burasań,
Olardıń hiyleleri biyhudadur.
119Dúnyadaǵı jawızlardı shıǵındıday etip taslaysań,
Sonlıqtan súyemen Seniń shártlerińdi.
120Sennen qorqqanımnan denem titireydi,
Húkimlerińnen qorqaman.

121Ádil hám tuwrı isler qıldım,
Eziwshilerdiń qolına qaldırma meni!
122Qulıńnıń baxtına kepillik ber,
Tákabbirlerdiń meni eziwine jol qoyma.
123Meni qutqarıwıńdı kútip,
Kózlerimniń nurı sóndi.
Meni azat etiwdi wáde qılǵan ediń.
124Qulıńa súyispenshiligińdi kórset,
Maǵan qaǵıydalarıńdı úyret.
125Men Seniń qulıńman, maǵan aqıl ber,
Shártlerińdi bilip alayın.
126Jaratqan Iye, Óz isińdi qılatuǵın waqtıń keldi,
Adamlar nızamıńdı buzdı.
127Seniń buyrıqlarıńdı,
Altınnan, sap altınnan da jaqsı kóremen.
128Sen bergen barlıq pármanlarıń boyınsha qádem basaman,
Hár bir jalǵan joldan jerkenemen.

129Seniń shártleriń ájayıp,
Sonlıqtan olarǵa ámel qılaman.
130Mánisi ashılǵanda, sózleriń nur shashadı,
Sadalarǵa aqıl beredi.
131Shóllep, awzımdı ashaman,
Seniń buyrıqlarıńa qushtarman.
132Atıńdı súygenlerge mudamı qılǵanıńday,
Názer salıp, maǵan rehim kórset.
133Sóziń menen qádemlerimdi bekkemle,
Hesh bir gúna meniń ústimnen húkimdarlıq qılmasın.
134Adamlardıń zulımlıǵınan azat qıl meni,
Solay etip, pármanlarıńa ámel qılaman.
135Seniń júziń qulıń bolǵan maǵan nurın shashsın,
Qaǵıydalarıńdı úyret maǵan.
136Dárya bolıp, jas tógiler kózlerimnen,
Nızamıńa ámel qılmay atır adamlar.

137Sen ádilseń, Jaratqan Iye,
Húkimleriń ádalatlı.
138Buyırǵan shártleriń ádalatlı,
Olar tolıq isenimli.
139Sózlerińdi umıttı dushpanlarım,
Soǵan degen ǵázebim dińkemdi qurttı.
140Sóziń sonday pák,
Qulıń onı súyedi.
141Men kereksizben, xorlanǵanman,
Biraq pármanlarıńdı umıtpayman.
142Seniń ádalatıń máńgidur,
Nızamıń haqıyqatdur.
143Qayǵı hám azapqa dus kelsem de,
Lázzet alaman buyrıqlarıńnan.
144Shártleriń máńgige ádalatlıdur,
Jasawım ushın maǵan aqıl ber.

145Pútkil júregim menen jalbarınaman,
Juwap ber maǵan, Jaratqan Iye!
Seniń qaǵıydalarıńa ámel qılaman.
146Meni qutqar dep, Saǵan dad salaman,
Shártlerińe ámel qılaman.
147Kún shıqpastan turıp, járdem sorayman,
Seniń sózińe úmit baylayman.
148Bergen wádeńdi túsineyin dep,
Túni boyı uyqı kelmes kózime.
149Súyispenshiligiń boyınsha dawısıma qulaq sal,
Húkimleriń boyınsha, janımdı aman saqla, Jaratqan Iye!
150Jawız joba dúzetuǵınlar jaqınlap qaldı,
Olar nızamıńnan uzaqlasqan.
151Biraq Jaratqan Iye, Sen janımdasań,
Barlıq buyrıqlarıń haqıyqatdur.
152Shártlerińdi máńgige tayınlaǵanıńdı,
Burınnan men túsindim.

153Shekken azaplarıma qara, qutqar meni,
Nızamıńdı umıtpadım.
154Sen meni jaqlap, meni qutqar,
Wádeń boyınsha janımdı saqla.
155Qutqarılıw jawızlardan uzaqdur,
Seniń qaǵıydalarıńdı olar izlemes.
156Rehimiń ullıdur, Jaratqan Iye,
Húkimleriń boyınsha janımdı saqla.
157Meni quwdalaytuǵın dushpanlarım kóp,
Sonda da shártlerińnen shetke shıqpadım.
158Opasızlardı kórgenimde jerkenemen,
Olar kórsetpelerińe ámel qılmaydı.
159Qara, pármanlarıńdı qanshelli súyemen,
Súyispenshiligiń menen janımdı saqla.
160Sózińniń negizi haqıyqatdur,
Ádil húkimlerińniń hámmesi máńgi dawam etedi.

161Húkimdarlar meni ayıpsız quwdalaydı,
Al júregim sózińnen qorqadı.
162Kóp olja tapqan adamday,
Seniń sózlerińe sonday quwanaman.
163Jalǵannan tiksinip, jerkenemen,
Biraq Seniń nızamıńdı súyemen.
164Ádil húkimleriń ushın,
Kúnine jeti márte Saǵan alǵıs aytaman.
165Nızamıńdı súygenler ullı abadanshılıqqa jetiser,
Olar hesh nársege súrnikpes.
166Jaratqan Iye, qutqarıwıńnan úmit qılaman,
Buyrıqlarıńdı orınlayman.
167Shártlerińe ámel qılaman,
Men olardı júdá jaqsı kóremen.
168Párman hám shártlerińe ámel qılaman,
Barlıq jollarımnan xabarıń bar.

169Páriyadım Saǵan jetsin, Jaratqan Iye,
Sóziń boyınsha danalıq ber maǵan.
170Jalbarınıwım Saǵan jetip barsın,
Wádeń boyınsha qutqar meni!
171Awzım alǵıs-maqtawǵa tolıp tassın,
Maǵan qaǵıydalarıńdı úyreteseń.
172Tilim sózińdi jırlasın,
Barlıq buyrıqlarıń ádil.
173Qolıń maǵan járdem bersin,
Pármanlarıńa boysınıwdı tańladım.
174Qutqarıwıńdı ańsayman, Jaratqan Iye,
Nızamıńnan lázzet alaman.
175Janımdı saqla, Saǵan alǵıslar aytayın,
Húkimleriń maǵan járdem bersin.
176Joytılǵan qoyday joldan adastım,
Qulıńdı izlep tawıp al,
Sebebi buyrıqlarıńdı umıtpadım.