Psa 13 | KaaIBT22L | STEP | Atqarıwshılardıń jetekshisine. Dawıttıń jırı Aqmaqlar óz kewlinde: «Quday joq», – der. Olar buzıldı, jerkenishli isler qılar, Jaqsılıq qılatuǵın hesh kim joq.

‏ Psalms 13

(Zab 52)

1 Atqarıwshılardıń jetekshisine. Dawıttıń jırı
Aqmaqlar óz kewlinde: «Quday joq», – der.
Olar buzıldı, jerkenishli isler qılar,
Jaqsılıq qılatuǵın hesh kim joq.

2 Aqıllı, yaǵnıy Qudaydı izleytuǵın bar ma eken, dep,
Jaratqan Iye kókten qarar adamzatqa.
3 Hámme adasqan, birdey buzılǵan,
Jaqsılıq qılatuǵın hesh kim joq,
Birde birewi joq!

4 Jawızlıq qılıwshılardıń hámmesi,
Nan jegen kibi xalqımdı jalmaytuǵınlar,
Jaratqan Iyeni shaqırmaytuǵınlar hesh nársege túsinbey me?
5 Olar qorqınıshqa túsedi,
Quday haq adamlar menen birgedur.
6 Napákler ezilgenlerdiń niyetin pushqa shıǵarsa da,
Jaratqan Iye ezilgenlerdiń panasıdur.

7 Kelse edi Izraildıń qutqarılıwı Sionnan!
Jaratqan Iye Óz xalqın abadanshılıqqa jáne eristirse,
Yaqıptıń urpaqları shadlanıp, Izrail quwanar edi!