Psalms 131
1Ibadatxanaǵa baratırǵanda aytılatuǵın jırJaratqan Iye, esle Dawıttı,
Onıń kórgen barlıq qıyınshılıqların.
2Ol Saǵan ant ishken edi,
Yaqıptıń Kúshli Qudayı,
Ol Saǵan wáde bergen edi:
3«Men kirmeymen úyime,
Jatpayman tósegime,
4Kózlerime uyqı bermeymen,
Qabaqlarımnıń jumılıwına jol qoymayman,
5Jaratqan Iyege bir orın,
Yaqıptıń Kúshli Qudayına bir mákan salmaǵansha!»
6Kelisim sandıǵınıń Efratada ekenin esittik,
Bizler onı Yaar dalalarınan taptıq.
7«Jaratqan Iyeniń mákanına barayıq,
Onıń ayaq qoyǵıshınıń aldında sıyınayıq», – dedik.
8Kóteril, Jaratqan Iye, Óz mákanıńa,
Qúdiretińniń belgisi bolǵan sandıǵıń menen birge.
9Ruwxaniyleriń ádillikke búrkenip alsın,
Sadıq qullarıń shadlanıp baqırıssın.
10Qulıń Dawıt ushın,
Óz maylaǵanıńnan waz keshpe.
11Jaratqan Iye, Sen Dawıtqa ant ishken ediń,
Sen usı antıńnan hasla qaytpaysań:
«Urpaǵıńnan, ullarıńnan birin,
Seniń taxtıńa otırǵızaman.
12Eger ullarıń kelisimime ámel qılsa,
Olarǵa úyretken qaǵıydalarımdı orınlasa,
Olardıń balaları da máńgige,
Seniń taxtıńa otıradı».
13Jaratqan Iye Siondı tańladı,
Onda Ózi jasawdı qáledi.
14Ol bılay dedi:
«Meniń máńgi mákanım usı,
Usı jerge ornalasaman, bunı Ózim qáledim.
15Ol jerdiń azıq-awqatın bereketleymen,
Ondaǵı jarlılardı toydıraman.
16Qutqarılıwǵa bóleymen ruwxaniylerdi,
Maǵan sadıqlar shadlanıp baqıradı.
17Ol jerde Dawıt urpaǵınan bir kúshli patsha shıǵaraman,
Ózim maylaǵan patshanıń shıraǵın sóndirmeymen.
18Dushpanların shermendelikke búrkeymen,
Al onıń basındaǵı taj jarqırap tura beredi».
Copyright information for
KaaIBT22L