‏ Psalms 138

1Atqarıwshılardıń jetekshisine. Dawıttıń jırı
O, Jaratqan Iye, meni tekserdiń hám meni bileseń,
2Qashan otırıp, qashan turatuǵınımdı bileseń,
Niyetimdi uzaqtan túsinip turasań.
3Júrsem de, jatsam da, meni teksereseń,
Xabarıń bar barlıq jollarımnan.
4Awzımnan ele bir sóz de shıqpay turıp,
Ne aytajaǵımdı Sen tolıq bileseń, Jaratqan Iye.
5Meni aldı-artımnan orap alǵansań,
Qolıńdı ústime qoyǵansań.
6Usı danalıǵıń men ushın júdá ájayıpdur,
Dım bálent, onı túsinip jete almayman.

7Seniń Ruwxıńnan qayaqqa qasha alaman?
Seniń dárgayıńnan qayaqqa kete alaman?
8Kóklerge shıqsam, Sen sol jerde barsań,
Óliler mákanına tússem, Sen ol jerde de barsań.
9Tańnıń qanatlarına minip ushsam,
Teńizdiń arǵı jaǵasına qonsam,
10Ol jerde de qolıń meni jeteler,
Oń qolıń meni uslap turar.
11Eger: «Qarańǵılıq meni qaplasın,
Átirapımdaǵı jaqtılıq túnge aylansın», – desem,
12Qarańǵılıq Sen ushın qarańǵı emes,
Tún kúndizdey jaqtı,
Qarańǵılıq ta, jaqtı da, Sen ushın birdey.

13Sen meniń jan-tánimdi jarattıń,
Anamnıń qursaǵında meni dórettiń.
14Saǵan alǵıs aytaman,
Men tań qalarlıq hám ájayıp etip jaratılǵanman.
Seniń isleriń ájayıp,
Bunı júdá jaqsı bilemen.
15Jasırın jerde jaratılǵanımda,
Jerdiń túbinde dóretilgenimde,
Súyeklerim Sennen jasırın emes edi.
16Qursaqqa túsken waqtımnan-aq meni Seniń kózleriń kórdi,
Maǵan ajıratılǵan kúnlerdiń ele hesh biri kelmesten burın,
Hámmesi Seniń kitabıńa jazılǵan edi.
17Men haqqında niyetleriń qanshelli sırlı, Quday,
Olardıń esap-sanı júdá kóp!
18Eger sanasam, olar qumnan da kóp,
Oyanǵanımda, men ele Seniń menen birgemen.

19Qáne endi, jawızlardı óltirseń, Quday!
Qanxorlar, mennen uzaqlasıń!
20Olar Sen arqalı ant iship, sum joba dúzedi,
Dushpanlarıń Seniń atıń menen jalǵan ant ishedi.
21Jaratqan Iye, Seni jek kórgenlerdi qalay jaman kórmeyin?
Saǵan qarsı shıqqanlardan qalay jerkenbeyin?
22Men olardı pútkilley jek kóremen,
Olardı ózimniń dushpanım dep esaplayman.

23Quday, meni tekserip, júregimdi bil,
Meni sınap kór hám pikirlerimdi bil.
24Qara, qáwipli jolda júrgen joqpan ba?
Meni Óziń máńgilik jolına jetele!