Psalms 142
1Dawıttıń jırıJaratqan Iye, duwamdı esit,
Jalbarınıwıma qulaq sal!
Sen sadıq hám ádalatlısań, juwap ber maǵan!
2Óz qulıń menen dawlaspa,
Tirilerdiń hesh biri Seniń aldıńda minsiz bolmas.
3Dushpanlarım meni quwǵın qıldı,
Ómirimdi jer menen jeksen qıldı.
Ázelde álemnen ótkenler sıyaqlı,
Meni qarańǵılıqta jasawǵa májbúrledi.
4Sonıń ushın, ruwxım tústi,
Júregim suwlap ketti.
5Ótken kúnlerdi esleymen,
Seniń barlıq isleriń haqqında oy juwırtaman,
Qollarıńnıń isleri haqqında pikir júritemen.
6Qollarımdı Saǵan sozaman,
Kewip qalǵan topıraq yańlı, janım Saǵan shólleydi. Selah
7Tez juwap ber maǵan, Jaratqan Iye,
Ruwxım túsip ketti.
Qábirge kirgen ólilerdey bolıp qalmawım ushın,
Mennen júzińdi jasırma.
8Azanda súyispenshiligińdi maǵan esittir,
Óytkeni men Saǵan isenemen,
Júretuǵın jolımdı Óziń kórset,
Júregimdi ashaman Saǵan.
9Dushpanlarımnan qutqar meni, Jaratqan Iye,
Sennen pana tabaman.
10Erkińdi orınlawdı maǵan úyret,
Sen meniń Qudayımsań,
Seniń iygilikli Ruwxıń,
Tegis joldan meni jetelesin!
11Jaratqan Iye, Óz atıń ushın janımdı saqla,
Sen ádalatlısań, meni apattan qutqar.
12Súyispenshiligiń haqı dushpanlarımdı joq qıl,
Janımda qastı barlardıń hámmesin qırıp tasla,
Men Seniń qulıńman.
Copyright information for
KaaIBT22L