Psalms 144
1Dawıttıń aytqan alǵıs-maqtawıQudayım, Patsha, Seni ullılayman,
Atıńdı máńgi-baqıy alǵıslayman.
2Seni hár kúni alǵıslayman,
Atıńdı máńgi-baqıy dańqqa bóleymen.
3Jaratqan Iye ullı, Ol maqtawǵa júdá ılayıqlı,
Onıń ullılıǵına aqıl jetpes.
4Islerińdi bir áwlad ekinshi áwladqa maqtap jetkizedi,
Qúdiretli islerińdi aytıp beredi.
5Seniń saltanatlı ullılıǵıń,
Ájayıp isleriń haqqında oy juwırtaman.
6Adamlar tań qalarlıq islerińniń qúdireti haqqında aytadı,
Men járiyalayman ullı islerińdi!
7Adamlar ullı iygiligiń haqqında bayan etedi,
Ádalatlıǵıńdı járiyalap, shadlanıp baqıradı.
8Jaratqan Iye miyrimli hám rehimli,
Sabır-taqatlı hám súyispenshiligi mol.
9Jaratqan Iye hámmege iygilikli,
Jaratqanlarınıń hámmesine rehimli.
10Barlıq jaratqanlarıń Seni alǵıslaydı, Jaratqan Iye,
Sadıq qullarıń Saǵan alǵıs-maqtawlar aytadı.
11Olar patshalıǵıńnıń ullılıǵı haqqında sóylep,
Kúsh-qúdiretiń tuwrısında aytıp beredi.
12Solay etip, hámme Seniń kúsh-qúdiretińdi,
Patshalıǵıńnıń ullı dańqın biledi.
13Seniń patshalıǵıń – máńgi patshalıq bolar,
Húkimdarlıǵıń áwladtan-áwladqa dawam eter. ▼
▼ Bazı qoljazbalarda mına sózler de bar: «Jaratqan Iye bergen wádesinde turar, Barlıq islerinde sadıqlıq kórseter».
14Jaratqan Iye jıǵılǵanlarǵa súyenish boladı,
Eki búgilgenlerdiń qáddin tuwrılaydı.
15Hámme úmit etip, Saǵan qaraydı,
Óz waqtında olardıń ırısqısın bereseń.
16Sen qolıńdı ashıp,
Pútkil janzatlardı qálegeninshe toydırasań.
17Jaratqan Iye barlıq jollarında ádil,
Islegen barlıq islerinde súyispenshiligin kórsetedi.
18Jaratqan Iye Ózin shaqırǵanlarǵa,
Shın kewilden shaqırǵanlarǵa jaqın boladı.
19Ózinen qorqqanlardıń tilegin beredi,
Nalasın esitip, olardı qutqaradı.
20Jaratqan Iye Ózin súygenlerdiń hár birin qorǵaydı,
Jawızlardıń hámmesin joq etedi.
21Awzım Jaratqan Iyege alǵıslar aytsın!
Pútkil janzatlar Onıń muxaddes atına,
Máńgi-baqıy alǵıs-maqtawlar aytsın.
Copyright information for
KaaIBT22L