Psalms 149
1Haliluya!Jaratqan Iyege jańa qosıq aytıń,
Sadıq qullarınıń jıyınında Onı alǵıslań!
2Izrail óz Jaratıwshısı sebepli quwansın,
Sion xalqı óz Patshasına shadlansın!
3Oyınǵa túsip, alǵıslar aytsın Onıń atına,
Dáp hám lira shertip, Oǵan alǵıs-maqtaw qosıǵın aytsın!
4Jaratqan Iye xalqına kewli toladı,
Kishipeyillilerge jeńis berip, olardı dańqqa bóleydi.
5Usı erisken húrmetine yoshlansın sadıq qulları,
Tóseklerinde shadlanıp baqırsın!
6Awızlarında Qudayǵa alǵıs-maqtawlar bolsın,
Qollarında eki júzli qılısh penen,
7Jat xalıqlardan ósh alsın,
Xalıqlarǵa jaza bersin.
8Olardıń patshaların shınjırlap,
Abıraylı adamlarına temir kisenler salsın!
9Olardıń ústinen shıǵarılǵan húkimdi orınlasın!
Barlıq sadıq qulları ushın bul húrmet bolar.
Haliluya!
Copyright information for
KaaIBT22L