‏ Psalms 17

(2Pat 22)

1Atqarıwshılardıń jetekshisine. Jaratqan Iyeniń qulı Dawıttıń jırı. Jaratqan Iye onı pútkil dushpanlarınan hám Shauldıń qolınan qutqarǵan kúni, Dawıt usı jırdı Oǵan arnap aytqan
2Seni súyemen, kúsh-qúdiretim Senseń, Jaratqan Iye!

3Jaratqan Iye – jartasım, qorǵanım hám qutqarıwshım.
Qudayım meniń qorǵawshı jartasım, Onnan pana tabaman,
Ol qalqanım, qúdiretli qutqarıwshım hám qorǵanımdur!
4Maqtawǵa ılayıqlı Jaratqan Iyeni shaqıraman,
Qutqarılaman dushpanlarımnan.
5Ájel arqanları shırmap alıp,
Nabıt qılıw aǵısları qorqıttı meni.
6Óliler mákanınıń arqanları bayladı meni,
Ólim duzaqları shıqtı qarsıma.
7Azap ishinde Jaratqan Iyege jalbarındım,
Járdemge shaqırdım Qudayımdı.
Ibadatxanasınan Ol dawısımdı esitti,
Qıshqırǵanım qulaǵına jetip bardı.

8Sol waqıtta jer júzi titirep, shayqaldı,
Silkindi tawlardıń negizgi tırnaqları,
Sebebi Jaratqan Iye ǵázepke mingen edi.
9Murnınan tútin kóterildi,
Awzınan jalmap jutatuǵın jalın shıǵıp,
Onnan kómir shoǵı jawdı.
10Kóklerdi jarıp, tómenge tústi,
Qara bult Onıń ayaǵınıń astında.
11Bir kerubqa ▼

▼ Kerub – qanatlı ruwxıy barlıq.

minip,
Samaldıń qanatları ústinde ushıp keldi.
12Ózin jasırıw ushın túnekti perde qıldı,
Qoyıw qara bultlardı Ózine shertek qıldı.
13Onıń aldındaǵı nurdan,
Burshaq hám kómir shoǵı qara bultlardı jarıp shıqtı.
14Gúrkiredi aspanda Jaratqan Iye,
Dawıs berdi Quday Taala.
Burshaq hám kómir shoǵı jawdı.
15Oqların atıp, dushpanlardı pıtırattı,
Shaqmaq shaqtırıp, olardı albıratıp tasladı.
16Jaratqan Iye, Seniń keyisińnen,
Murnıńnan shıqqan kúshli demińnen,
Suwlardıń túbi kórindi,
Dúnyanıń tiykarı ashılıp qaldı.

17Aldı meni Jaratqan Iye qolın sozıp joqarıdan,
Hám shıǵardı tereń suwlardan.
18Qutqardı meni kúshli dushpanımnan,
Mennen kúshlirek bolǵan,
Meni jek kóretuǵınlardan.
19Qarsı turdı olar maǵan basıma is túskende,
Biraq tirek boldı maǵan Jaratqan Iye.
20Ol keń jerge shıǵardı meni,
Kewli tolıp, qutqardı meni.

21Jaratqan Iye haqlıǵım ushın sıy berip,
Pák qollarım ushın esesin qaytardı.
22Óytkeni júrdim Jaratqan Iyeniń jolı menen,
Jamanlıq islemedim, Qudayımnan uzaqlasıp.
23Kóz aldımda saqladım barlıq qararların,
Qaǵıydaların shetke ısırıp qoymadım.
24Minsiz boldım Onıń aldında,
Ózimdi saqladım gúna islewden.
25Esesin qaytardı Jaratqan Iye haqlıǵım ushın,
Kóz aldında qollarımnıń pákligi ushın.

26Sen sadıqqa sadıqlıq kórsetip,
Minsizge minsiz bolasań.
27Pák adamǵa pákligińdi kórsetip,
Jalatayǵa jalatayshılıǵına góre is tutasań.
28Ezilgenlerdi qutqarasań,
Menmenlerdi bolsa, jerge urasań.
29Qudayım Jaratqan Iye, shıraǵımdı jaǵıwshı,
Qarańǵılıǵımdı jaqtılandırıwshı Senseń.
30Seniń menen láshkerlerdi qıyratıp,
Qudayım menen diywallardan asarman.

31Qudaydıń jolı minsiz,
Jaratqan Iyeniń sózi isenimli,
Ol qalqanı Ózinen pana izlegen hár bir adamnıń.
32Jaratqan Iyeden basqa Quday bar ma?
Qudayımızdan basqa qorǵawshı jartas bar ma?
33Quday meni kúshke toltırar,
Jolımdı minsiz qılar.
34Kiyiktiń ayaqlarınday qılar ayaqlarımdı,
Qoyar meni biyikliklerge.
35Úyretedi qollarımdı urısıwǵa,
Hám qola oq jaydı kerip tartıwǵa.
36Bereseń maǵan qutqarılıw qalqanıńdı,
Oń qolıń maǵan súyenish boladı,
Mártebeli qılar járdemiń meni.
37Keń qılarsań basar jolımdı,
Ayaqlarım meniń súrnikpes.
38Dushpanlarımnıń izinen quwıp, jetip aldım,
Olardı joq qılmay turıp, izge qaytpadım.
39Ezip tasladım, tura almay qaldı olar,
Ayaqlarım astında sozılıp jattı.
40Sawash ushın meni toltırdıń kúshke,
Maǵan qarsı shıqqanlardı bas iydirdiń aldımda.
41Dushpanlarımdı mennen qashatuǵın qıldıń,
Men de ózimdi jek kórgenlerdi joq ettim.
42Jalbarındı olar, biraq qutqarǵan bolmadı,
Jaratqan Iyeni shaqırdı, biraq Ol juwap bermedi.
43Ezdim olardı samal ushırǵan shań sıyaqlı,
Daladaǵı ılay sıyaqlı shashıratıp tasladım.

44Qutqardıń xalıqtıń kóterilisinen,
Milletlerdiń basshısı qıldıń meni,
Xızmet eter ózim tanımaytuǵın xalıqlar maǵan.
45Men tuwralı esitiwden boysınıp,
Jat elliler mennen aybındı.
46Jat ellilerdiń júzleri quwarıp,
Shıqtı titirep, panalaǵan jerlerinen.
47Jaratqan Iye tiri, Qorǵawshı jartasıma alǵıslar bolsın!
Qutqarıwshım Quday ullılansın!
48Ol boladı dushpanlarımnan ósh alıwıma jol qoyǵan,
Xalıqlardı maǵan baǵınıshlı qılǵan.
49Qutqarar Ol dushpanlarımnan,
Awa, ústin qılar maǵan qarsı shıqqanlardan,
Azat qılar jawızlardıń qolınan.
50Bunıń ushın, Jaratqan Iye,
Táriyipleymen Seni milletler arasında,
Saz shertip alǵıs aytaman arnap atıńa.
51Jaratqan Iye Óz patshasın ullı jeńislerge eristirer,
Maylaǵan patshası Dawıtqa hám onıń urpaǵına,
Máńgige miyrim-shápáátin kórseter.