Psalms 26
1Dawıttıń jırıJaratqan Iye meniń nurım hám qutqarıwshım,
Men kimnen qorqaman?
Jaratqan Iye ómirimniń qorǵanı,
Meni kim qorqıta aladı?
2Denemdi tilkimlew ushın jawızlar ústime bastırıp kelgende,
Jawlarım hám dushpanlarım maǵan qarsı shabıwıl jasaǵanda,
Ózleri súrnigip, qulaydı.
3Bir orda láshker meni qamal qılsa da,
Júregim qorqpas,
Maǵan qarsı urıs baslansa da,
Úmitim úzilmes.
4Jaratqan Iyeden bir tilegim hám izlegenim mınaw:
Jaratqan Iyeniń Úyinde ómir boyı jasaw,
Onıń gózzallıǵın kóriw,
Ibadatxanasında sıyınıp, oy juwırtıw.
5Apatta qalǵan kúnlerimde,
Ol meni Óz panasında aman saqlaydı.
Shatırınıń ishine jasırıp meni,
Bálent jartas ústine alıp shıǵadı.
6Sonda átirapımdaǵı dushpanlarım ústinen,
Basım joqarı kóteriledi.
Jaratqan Iyeniń shatırında qurbanlıq beremen,
Shadlanıp, alǵıslaw qurbanlıǵın beremen,
Saz shertip, Onı jırlayman.
7Jaratqan Iye, qulaq sal dawısıma, Saǵan jalbarınaman,
Rehim etip, juwap ber maǵan!
8«Meniń júzimdi izle!» degenińdi kewlim esitti,
Awa, Jaratqan Iye, Seniń júzińdi izleymen.
9Júzińdi mennen jasırma,
Ǵázeplenip, qulıńnan júz burma!
Járdemshim Sen boldıń,
Júz burıp, meni tárk etpe,
Quday, qutqarıwshım meniń!
10Ata-anam meni taslap ketse de,
Jaratqan Iye meni qabıl etedi.
11Jaratqan Iye, jolıńdı úyret maǵan,
Buqqıda jatqan dushpanlarıma bola,
Tuwrı soqpaqlarıńnan jetele meni.
12Jawlarımnıń qolına tapsırma meni,
Jalǵan gúwalar, nahaq ayıplawshılar,
Maǵan qarsı shıqtı.
13Biraq mınaǵan anıq isenemen:
Men tiriler áleminde júrip,
Jaratqan Iyeniń iygiligin kóremen.
14Jaratqan Iyege úmit qıl,
Kúshli hám márt bol,
Jaratqan Iyege úmit qıl.
Copyright information for
KaaIBT22L