Psalms 27
1Dawıttıń jırıSaǵan jalbarınaman, Jaratqan Iye,
Qorǵawshı jartasım, esitpey qalma dawısımdı.
Eger maǵan juwap bermey, únsiz qalsań,
Ólim shuqırına túsken adamday bolıp qalaman.
2Seni járdemge shaqırǵanımda,
Qollarımdı muxaddes Ibadatxanańa sozǵanımda,
Qulaq sal jalbarınıwlarıma.
3Meni jawızlar hám nahaqlıq qılatuǵınlar menen,
Bir qatarǵa qoyıp, jazalama.
Olar adamlar menen doslarsha qatnasta bolıp,
Júreklerinde jawızlıq islewdi niyet qılar.
4Qılmıslarınıń, islegen jawızlıqlarınıń esesin qaytar,
Qolları menen islegen nahaqlıqlarına jarasa jaza ber.
5Olar itibar bermes Jaratqan Iyeniń islerine,
Onıń qollarınıń dóretpesine.
Sonıń ushın, Jaratqan Iye olardı qulatadı,
Olar qaytadan tiklene almaydı.
6Jaratqan Iyege alǵıslar bolsın!
Ol qulaq saldı meniń jalbarınıwlarıma.
7Jaratqan Iye kúsh-quwatım hám qalqanımdur,
Júrekten Oǵan úmit etemen,
Ol maǵan járdem berdi, júregim yoshlanar,
Qosıqlarım menen Oǵan alǵıs aytaman.
8Jaratqan Iye Óz xalqınıń qúdiretidur,
Ózi maylaǵan patshanıń qutqarılıw qorǵanıdur.
9Xalqıńdı qutqar, Óz menshik xalqıńdı jarılqa,
Olardıń shopanı bol, máńgi ǵamxorlıq qıl!
Copyright information for
KaaIBT22L