Psalms 29
1Dawıttıń jırı. Jaratqan Iyeniń úyi baǵıshlanǵan waqıtta aytılǵan qosıq2Seni ullılayman, Jaratqan Iye,
Meni joqarı alıp shıqtıń,
Dushpanlarımnıń meniń ústimnen,
Kúliwine jol qoymadıń.
3Qudayım Jaratqan Iye,
Saǵan jalbarındım, maǵan shıpa berdiń.
4Jaratqan Iye, janımdı óliler mákanınan alıp shıqtıń,
Ólim shuqırına túsip baratırǵanımda, meni qutqardıń.
5Háy Jaratqan Iyeniń sadıq qulları,
Saz shertip, Onı alǵıslań,
Onıń muxaddes atın táriyipleń!
6Onıń ǵázebi bir mezgil,
Al mehribanlıǵı bir ómir dawam eter.
Qayǵı-azap bir tún bolar,
Biraq azan menen quwanısh kirip keler.
7Áwmetli bolıp, isim júriskende,
«Hasla súrnikpespen!» – degen edim.
8Jaratqan Iye, mehriń menen,
Meni tawday qılıp bekkemlediń.
Biraq Sen júzińdi jasırǵanıńda,
Qorqınısh biylep aldı meni.
9Jaratqan Iye, Seni shaqırdım,
Iyeme jalbarınıp, rehim soradım:
10«Eger men kirsem qábirge,
Ólimimnen Saǵan ne payda?
Topıraq Saǵan alǵıs ayta ma?
Seniń sadıqlıǵıńdı járiyalay ma?
11Qulaq sal, Jaratqan Iye, maǵan rehim qıl,
Járdemshim bol, Jaratqan Iye!»
12Qayǵımdı oyın-kúlkige aylandırdıń,
Aza kiyimimdi sheship, shadlıqqa bólediń.
13Janım Seni alǵıslap qosıq aytsın, únsiz qalmasın,
Saǵan máńgi minnetdarshılıq bildiremen, Qudayım Jaratqan Iye.
Copyright information for
KaaIBT22L