‏ Psalms 30

(Zab 70:1-3)

1Atqarıwshılardıń jetekshisine. Dawıttıń jırı
2Jaratqan Iye, Seni panalayman,
Meni hasla shermende qılma!
Ádalatlıǵıń menen qutqar meni!
3Maǵan qulaǵıńdı túrip, dárhal qutqar meni,
Panalaytuǵın jartasım bol,
Qutqarılıwım ushın, bekkem qorǵan bol!
4Shınında da, Sen jartasım hám qorǵanımsań,
Óz atıń ushın meni jetele, jol kórset maǵan.
5Maǵan qarsı qoyılǵan tordan uzaqlat meni,
Ózińseń meniń panam.
6Janımdı qollarıńa tapsıraman,
Jaratqan Iye, sadıq Quday, qutqar meni.

7Jaramsız butlarǵa tabınıwshılardan jerkenemen,
Jaratqan Iyege úmit baylayman.
8Sadıqlıǵıń arqalı yoshıp, shad bolayın,
Qayǵılarımdı Óziń kórdiń,
Shekken azaplarımdı bileseń.
9Meni dushpannıń qolına tapsırmadıń,
Al ayaqlarımdı keń jerge bastırdıń.

10Rehim qıl maǵan, Jaratqan Iye, qıyınshılıqtaman,
Qayǵıdan kózlerimniń nurı sóndi,
Jan-tánim de tamam boldı.
11Ómirim azap penen,
Jıllarım ah urıw menen tawısılar,
Gúnalarım sebepli kúshim qaytıp,
Súyeklerim quwrap qalar.
12Dushpanlarım sebepli jek kórinishli boldım,
Ásirese óz qońsılarıma.
Doslarım da awhalımdı kórip qorqadı,
Kóshede kórgenler mennen qashatuǵın boldı.
13Marhum sıyaqlı umıt boldım men,
Sınıp qalǵan ıdısqa uqsayman.
14Kóplerdiń ósek sózlerin esitip atırman,
Olar maǵan qarsı til biriktirdi,
Janımdı alıw ushın joba dúzdi,
Átirapımdı qorqınısh orap aldı.

15Jaratqan Iye, men Saǵan úmit baylayman,
«Qudayım Senseń!» dep aytaman.
16Táǵdirim Seniń qolıńda,
Meni dushpanlarımnıń qolınan,
Qutqara gór izime túskenlerden.
17Seniń júziń qulıńa nurın shashsın,
Súyispenshiligińdi kórsetip, qutqar meni!
18Shermende qılma meni, Jaratqan Iye,
Járdem sorap, Saǵan jalbarınaman.
Jawızlar shermende bolsın,
Óliler mákanında únleri óshsin.
19Menmenlik penen, joqarıdan qarap,
Haq adamnan jerkenip, onı kemsitip sóylegenniń,
Óshsin jalǵan sesleri.

20Iygiligiń sonshelli moldur, Jaratqan Iye,
Onı Ózińnen qorqqanlar ushın saqlaysań,
Hámmeniń kóz aldında,
Sennen pana tapqanlarǵa jaqsı qatnas qılasań.
21Adamlardıń jawız jobasınan,
Dárgayıńda pana bolıp, olardı qorǵaysań,
Jaman tillerden,
Óz panańda saqlaysań.

22Jaratqan Iyege alǵıslar bolsın,
Qamaldaǵı qalada qalǵanımda,
Ájayıp miyrim-shápáátińdi kórsettiń maǵan.
23Qorqınıshqa túsip, bılay dedim:
«Seniń dárgayıńnan shıǵarıldım!»
Biraq járdemge shaqırǵanımda Seni,
Esittiń meniń jalbarınıwımdı.

24Jaratqan Iyeni súyiń, háy Onıń sadıq qulları!
Jaratqan Iye isenimli adamlardı qorǵaydı,
Menmenlerge tolıq jaza beredi.
25Háy, Jaratqan Iyege úmit baylaǵanlar,
Kúshli bolıń hám márt bolsın júregińiz!