Psa 32 | KaaIBT22L | STEP | Háy, haq adamlar, Jaratqan Iyede shadlanıp baqırıń! Ádil adamlarǵa jarasar Oǵan alǵıs-maqtaw aytıw.

‏ Psalms 32

1 Háy, haq adamlar,
Jaratqan Iyede shadlanıp baqırıń!
Ádil adamlarǵa jarasar Oǵan alǵıs-maqtaw aytıw.
2 Lira ^{▼▼ Lira – barmaq penen shertiletuǵın tarlı saz ásbabı.} shertip, Jaratqan Iyeni táriyipleń,
On tarlı arfada Oǵan arnap nama shalıń.
3 Oǵan arnap taza qosıq aytıń,
Bálent dawıs penen shadlanıp, saz shertiń.

4 Jaratqan Iyeniń sózi haqıyqatdur,
Onıń hár bir isi isenimlidur.
5 Jaratqan Iye haqlıqtı hám ádalatlıqtı súyer,
Jer júzi Onıń súyispenshiligine tolar.

6 Kókler Jaratqan Iyeniń buyrıǵı menen,
Aspan deneleri awzınan shıqqan sózi menen jaratılǵan.
7 Ol teńiz suwların bir jerge jıynar,
Túpsiz suwlardı suw saqlaǵıshlarǵa sıydırar.
8 Pútkil dúnya júzi Jaratqan Iyeden qorqsın,
Jer júzinde jasap atırǵannıń barlıǵı Onnan seskensin.
9 Ol sóyledi, aytqanı bar boldı,
Buyrıq berdi, hámmesi payda boldı.
10 Jaratqan Iye milletlerdiń jobaların buzar,
Xalıqlardıń niyetlerin bosqa shıǵarar.
11 Biraq Jaratqan Iyeniń jobaları máńgi turar,
Júregindegi niyetleri áwladtan-áwladqa dawam eter.

12 Qanday baxıtlı, Qudayı Jaratqan Iye bolǵan millet,
Qanday baxıtlı, Jaratqan Iye tańlap alǵan xalıq.
13 Jaratqan Iye kókten kóz taslar,
Pútkil adamzattı kórer.
14 Ol taxtta otırǵan jerinen,
Gúzeter jer júzinde jasaytuǵınlardıń hámmesin.
15 Ol hámmeniń júregin jaratqan,
Olardıń isleriniń hámmesin biler.

16 Áskeri kóp bolǵanı menen, patsha qutqarılmas,
Ullı kúshi menen jawınger jeńe bermes.
17 Jeńis ushın sawash atları bos úmitdur,
Olar qúdiretli kúshi menen qutqara almas.
18 Jaratqan Iyeniń kózi Ózinen qorqatuǵınlarda,
Onıń súyispenshiliginen úmit etetuǵınlarda.
19 Olardıń janın ólimnen qutqarar,
Ashlıq dáwirde olardı tiri qaldırar.

20 Janımız Jaratqan Iyeden úmit eter,
Ol járdemshimiz hám qalqanımız.
21 Ol arqalı júregimiz quwanıshqa tolar,
Onıń muxaddes atına úmit baylaymız.
22 Jaratqan Iye, mudamı úmit baylaymız Saǵan,
Súyispenshiligiń bizlerge yar bolsın!